уйғур почтиси, 2-март

алп

сүрәттә, солдин оңға: Denk партийәси лидири ситефан ван барле (Stephan van Baarle), уйғур паъалийәтчи абдуреһим ғени вә партийәниң гага шәһәрлик шөбә мәсъули нур иҗар (Nur Icar).

голландийәдики уйғур паъалийәтчи абдуреһим ғениниң 14-феврал күни гага шәһәрлик һөкүмәт бинасида, хитай консолиниң һимайисидә уйуштурулған чағанлиқ тәбрикләш паъалийити җәрйанида тинч намайиш қиливатқанда җисманий һуҗум вә өлүм тәһдитигә учриғанлиқи, голландийә таратқулири вә сийасий саһәсидә күчлүк инкас қозғиди. 

тинч намайиш қиливатқан абдуреһим ғениға хитай аманлиқ хадимлири тәрипидин қилинған бу зораванлиқ, «чегра һалқиған бастуруш»ниң барғансери еғирлишиватқанлиқидин бешарәт бәрмәктә.

голландийәдики көчмәнләр вә аз санлиқларниң кишилик һоқуқ мәсилилиригә нуқтилиқ көңүл бөлидиған «De Kanttekening» тори бу һәқтә мәхсус хәвәр елан қилди. мәзкур таратқу хитай аманлиқ хадимлириниң тинч намайишчиға зораванлиқ қилишини «қанунсизлиқ» вә «писхикилиқ террор» дәп баһалиди. хәвәрдә алаһидә тәкитлинишичә, хитай хадимлири абдуреһим ғениға җисманий зорлуқ ишлитиш билән биргә, униң қулиқиға «сени өлтүриветимиз» дәп пичирлап тәһдит салған. бу хил системилиқ қорқутуш усулиниң паъалийәтчиниң роһий һалити, бихәтәрлик туйғуси вә әркин пикир қилиш һоқуқиға еғир зәрбә болғанлиқи қәйт қилинмақта.

бу вәқә голландийәдики сийасий партийәләрдин бири болған «Denk» партийәсиниң җиддий диққитини тартти. паъалийәтчи абдуреһим ғениниң «уйғур почтиси»ға билдүрүшичә, у 28-феврал күни гага шәһиридә «Denk» партийәси тәрипидин орунлаштурулған иптарлиқ паъалийитигә алаһидә тәклип билән қатнашқан. паъалийәт җәрйанида партийә лидири ситефан ван барле (Stephan van Baarle) вә партийәниң гага шәһәрлик шөбә мәсъули нур иҗар (Nur Icar) билән йүзтуранә көрүшкән. ситефан әпәнди абдуреһим ғениниң паъалийәтлиригә йуқири баһа бериш билән биргә, йүз бәргән зораванлиқ вәқәсидин толуқ хәвәрдар икәнликини вә буниңдин қаттиқ әпсуслинидиғанлиқини билдүргән.

көрүшүш җәрйанида абдуреһим ғени: «бу голландийә тупрақлиридики чегра һалқиған бастурушниң еғир бир мисали. биз бейҗиңниң узун қоллириниң демократийә вә бихәтәрликимизгә бузғунчилиқ қилишиниң алдини елишимиз керәк» дегәнләрни тәкитләп, мәсилиниң парламентта оттуриға қойулушини тәләп қилған. ситефан ван барле вәқәниң синлирини көргәнликини, буниң ениқла бир «чегра һалқиған бастуруш» икәнликини  тәстиқлиған. у паъалийәтчидин барлиқ дәлил-испатларни йиғип әвәтип беришни тәләп қилип, мәсилини голландийә парламентида күнтәртипкә елип келишкә тиришидиғанлиқиға вәдә бәргән.

игилинишичә, абдуреһим ғени вәқәдин кейин дәрһал сақчиға мәлум қилған болуп, нөвәттә рәсмий дело турғузулған. у өзигә зораванлиқ қилған вә өлүм тәһдити салған хитай хадимлириниң кимликиниң ениқлинишини һәмдә уларниң голландийә қануни бойичә җазалинишини тәләп қилмақта.

 бу вәқә хитай һөкүмитиниң чәтъәлдики уйғур паъалийәтчилирини бесиқтуруш урунушлириниң йәнә бир типик мисали сүпитидә қаралмақта.