uyghur pochtisi, 2-mart
alp
sürette, soldin onggha: Denk partiyesi lidiri sitéfan wan barlé (Stephan van Baarle), uyghur pa’aliyetchi abduréhim ghéni we partiyening gaga sheherlik shöbe mes’uli nur ijar (Nur Icar).
gollandiyediki uyghur pa’aliyetchi abduréhim ghénining 14-féwral küni gaga sheherlik hökümet binasida, xitay konsolining himayiside uyushturulghan chaghanliq tebriklesh pa’aliyiti jeryanida tinch namayish qiliwatqanda jismaniy hujum we ölüm tehditige uchrighanliqi, gollandiye taratquliri we siyasiy saheside küchlük inkas qozghidi.
tinch namayish qiliwatqan abduréhim ghénigha xitay amanliq xadimliri teripidin qilin’ghan bu zorawanliq, «chégra halqighan basturush»ning barghanséri éghirlishiwatqanliqidin bésharet bermekte.
gollandiyediki köchmenler we az sanliqlarning kishilik hoquq mesililirige nuqtiliq köngül bölidighan «De Kanttekening» tori bu heqte mexsus xewer élan qildi. mezkur taratqu xitay amanliq xadimlirining tinch namayishchigha zorawanliq qilishini «qanunsizliq» we «pisxikiliq térror» dep bahalidi. xewerde alahide tekitlinishiche, xitay xadimliri abduréhim ghénigha jismaniy zorluq ishlitish bilen birge, uning quliqigha «séni öltüriwétimiz» dep pichirlap tehdit salghan. bu xil sistémiliq qorqutush usulining pa’aliyetchining rohiy haliti, bixeterlik tuyghusi we erkin pikir qilish hoquqigha éghir zerbe bolghanliqi qeyt qilinmaqta.
bu weqe gollandiyediki siyasiy partiyelerdin biri bolghan «Denk» partiyesining jiddiy diqqitini tartti. pa’aliyetchi abduréhim ghénining «uyghur pochtisi»gha bildürüshiche, u 28-féwral küni gaga shehiride «Denk» partiyesi teripidin orunlashturulghan iptarliq pa’aliyitige alahide teklip bilen qatnashqan. pa’aliyet jeryanida partiye lidiri sitéfan wan barlé (Stephan van Baarle) we partiyening gaga sheherlik shöbe mes’uli nur ijar (Nur Icar) bilen yüzturane körüshken. sitéfan ependi abduréhim ghénining pa’aliyetlirige yuqiri baha bérish bilen birge, yüz bergen zorawanliq weqesidin toluq xewerdar ikenlikini we buningdin qattiq epsuslinidighanliqini bildürgen.
körüshüsh jeryanida abduréhim ghéni: «bu gollandiye tupraqliridiki chégra halqighan basturushning éghir bir misali. biz béyjingning uzun qollirining démokratiye we bixeterlikimizge buzghunchiliq qilishining aldini élishimiz kérek» dégenlerni tekitlep, mesilining parlaméntta otturigha qoyulushini telep qilghan. sitéfan wan barlé weqening sinlirini körgenlikini, buning éniqla bir «chégra halqighan basturush» ikenlikini testiqlighan. u pa’aliyetchidin barliq delil-ispatlarni yighip ewetip bérishni telep qilip, mesilini gollandiye parlaméntida küntertipke élip kélishke tirishidighanliqigha wede bergen.
igilinishiche, abduréhim ghéni weqedin kéyin derhal saqchigha melum qilghan bolup, nöwette resmiy délo turghuzulghan. u özige zorawanliq qilghan we ölüm tehditi salghan xitay xadimlirining kimlikining éniqlinishini hemde ularning gollandiye qanuni boyiche jazalinishini telep qilmaqta.
bu weqe xitay hökümitining chet’eldiki uyghur pa’aliyetchilirini bésiqturush urunushlirining yene bir tipik misali süpitide qaralmaqta.
