уйғур почтиси, 24-феврал
америка авам палатасиниң рәъиси майк җонсон (җумһурийәтчи, луъизанна шитатидин) хитайда йәттә йилдин көп вақиттин бери түрмидә йетиватқан уйғур дохтур гүлшән аббасниң қизи зиба муратни сәйшәнбә күни өткүзүлидиған «дөләт әһвалидин мәлумат» (SOTU) нутуқиға алаһидә меһман сүпитидә тәклип қилди.
зиба муратниң аниси дохтур гүлшән аббас 2018-йилидин бери хитайда тутқун қилинған. зиба мурат вә униң һаммиси рошән аббас ханимлар узундин буйан ашкара һалда, гүлшән аббасниң тутқун қилинишини — рошән аббасниң хитайниң уйғурларға қаратқан кәң көләмлик қамаққа елиш вә мәҗбурий әмгәк қатарлиқ зулумлириға қарши паъалийәтлиригә қаритилған бир хил өч елиш, дәп қарап кәлмәктә.
майк җонсон «The Hill» гезитигә бәргән байанатида мундақ деди: «2018-йили, дохтур гүлшән аббас- униң аъилә әзалири хитай компартийәсиниң уйғур мусулманлириға қаратқан рәзил муъамилиси һәққидә сөз қилип бир қанчә күндин кейин, шинҗаң уйғур аптоном районида хитай компартийәси тәрипидин мәҗбурий тутқун қилинди вә қолға елинди.»
у йәнә сөзини давамлаштуруп: «биз хитайниң нсан һәқлири дәпсәндичиликлирини хәлқъара җәмъийәтниң диққәт мәркизигә елип келиш вә наһәқ тутуп турулуватқанларниң һәммисини қойуп беришкә чақиришни давамлаштуруватқан пәйттә, дохтур гүлшән аббасниң қизи зиба муратни пирезидент трампниң дөләт әһвалидин мәлумат бериш нутқиға меһман сүпитидә тәклип қилиш мән үчүн шәрәптур» деди.
зиба мурат вә униң анисиниң әһвали илгириму авам палатаси хитай ишлири алаһидә комитети вә башқа қанун түзгүчиләр тәрипидин тәкитлинип кәлгән иди.
«дөләт әһвалидин мәлумат» (State of the Union) нутқи — америка пирезидентиниң һәр йили дөләт мәҗлисидә америкиниң нөвәттики вәзийити вә йиллиқ хизмәт пилани һәққидә беридиған алаһидә доклатидур. бу мунасивәт билән өткүзүлидиған йиғинға пирезидент вә дөләт мәҗлиси әзалири өзлири көңүл бөлидиған муһим саһәләргә вәкиллик қилидиған алаһидә меһманларни тәклип қилиду.
