17-noyabir, uyghur pochtisi
15-noyabir uyghur amérika birleshmisi wirjiniye shtatining fayrfakis shehirige jaylashqan uyghur merkizide uyghurlarning eng muhim tarixi xatire künliridin biri bolghan sherqiy türkistan jumhuriyet künini xatirilesh murasmi ötküzdi.
murasim bashlinip, aldi bilen yéngidin saylan’ghan amérika uyghur birleshmisining re’isi msran bu muhim künni xatirileshning ehmiyiti heqqide sözlidi, andin pa’aliyetke qatnashqanlarni merkez aldidiki meydanda ötküzilidighan sherqiy türkistan bayriqini chiqirish murasimigha teklip qildi. murasimida sherqiy türkistan dölet marshigha egiship, ay-yultuzluq kök bayraq asman’gha kötürülüp pa’aliyetke qatnashqan kishilerni hayajan’gha saldi.
bayraq chiqirish murasimidin kéyin, uyghur milliy herikiti teshkilatining re’isi rabiye qadir xanim söz qildi.
arqidin bügünki pa’aliyetke teklip bilen qatnashqan wirjiniye shitatining sénatori sitélla pékariskiy (Stella Pekarsky) bilen amérika dölet mejlisining ezasi jamés walkinshaw (James Walkinshaw) sözlidi.
dölet mejlisining ezasi jamés walkinshaw bu heqtiki ammiwi bayanatida mundaq yazghan: «bügün chüshtin kéyin men feyrfakstiki uyghur amérika jama’itining uyghur jumhuriyitini xatirilesh pa’aliyitige qatnashtim. feyrfakis nahiyisi amérikidiki eng chong uyghur nopusigha sahibxanliq qilidu; ularning tarixi, medeniyiti we hazir dawam qiliwatqan kishilik hoquq köreshliri körülüshke we anglinishqa erziydu. bügünki bu tesirlik pa’aliyetke teklip qilghanliqinglar we rehberlikinglar üchün amérika uyghur birleshmisige rehmet éytimen.»
pa’aliyette doktur eset sulayman 1933-yili qurulghan sherqiy türkistan islam jumhuriyiti bilen 1944-yili qurulghan sherqiy türkistan jumhuriyiti tarixidiki diqqet qilishqa tégishlik bezi muhim nuqtilar heqqide pakitliq we tepsiliy melumat berdi. ikki jumhuriyet tarixini téximu roshenleshtüridighan bu melumatlar pa’aliyetke qatnashqan uyghur jama’itide chongqur tesir qaldurdi.
pa’aliyette yene jenggiwar naxshilar orunlinip, uyghurlarning öz musteqilliqini qayta eslige keltürüshke bolghan iradisi we ümidi namayan qilindi.
pa’aliyetke irade qeshqiri riyasetchilik qildi.
pa’aliyettin kéyin, bu merkezde pat -pat uyushturulup turidighan uyghur bazar qizip ketti.
