uyghur pochtisi, 16-féwral, washin’gton

yéqinda amérikining wirginiye shtati chantilli (Chantilly) shehiridiki «okyanus réstorani»da, qazaqistandin kelgen dangliq ressam we qol hünerwen hashim qurban ependining resim körgezmisi tentenilik ötküzüldi.

amérika uyghur medeniyet mirasliri türi (AUCHP) teshkilati teripidin uyushturulghan bu körgezmige wirginiye shtati we niyuyork shehiridin kelgen 100 din artuq uyghur jama’iti qatnashti. pa’aliyette yene amérika dölet mejlisining yuqiri derijilik xadimi pyro tozzi (Piero Tozzi) we uyghur kishilik hoquq qurulushining diréktorliridin lu’isa griw (Louisa Greve) xanimlarmu méhman süpitide hazir boldi.

ataqliq ressam hashim qurbanning eserliri özgiche bedi’iy uslubi bilen alahide közge chéliqidu. uning eserliride qedimki budda medeniyiti dewridin bügünki kün’giche bolghan insan simaliri we menziriler séhirlik bir uslubta teswirlen’gen. hashim qurban resim sizishtin sirt, yene yaghach oymachiliqi we qapaqqa resim sizishtek alahide mahariti bilen tamashibinlarni heyran qaldurdi. bolupmu uning uyghurlarning bügünki échinishliq weziyiti we irqiy qirghinchiliq teswirlen’gen eserliri körürmenlerning küchlük diqqitini qozghidi. qazaqistanning «xizmet körsetken 1000 ijadkar» mukapatigha érishken bu sen’etkarning eserliri ilgiri rusiye we yawropa döletliridiki muhim körgezmilerde körsitilgen idi.

körgezme jeryanida, ressam hashim qurban özining «öyige kirelmeywatqan derwishler» namliq menidar esirini uyghur kishilik hoquq qurulushining ijrahiye diréktori ömer qanat ependige teqdim qildi.

pa’aliyetni uyushturghuchi, amérika uyghur medeniyet mirasliri türining diréktori medine bawudun xanim bu heqte toxtilip: «uyghur medeniyet-sen’itini qoghdash nöwette her bir uyghurning muhim wezipisi. bizning bu pa’aliyetni teshkilleshtiki meqsitimiz — öz kimlikimiz we medeniyitimiz xirisqa duch kéliwatqan peytte, uni saqlap qélishla emes, belki küchlendürüsh we rawajlandurushtur. buning üchün bizning kelgüside qilidighan nurghun xizmet pilanlirimiz bar» dédi. u yene mezkur teshkilatning bundaq pa’aliyetlerni dawamliq ötküzüp, uyghur sen’itini dunyagha tonutush üchün tirishchanliq körsitidighanliqini bildürdi.

pa’aliyetke amérikida közge körün’gen uyghur yash wekilliridin asna tahir izgil janliq we sap uyghur tilida riyasetchilik qilip, kéyinki ewladning sen’et-medeniyetke warisliq qilish rohining emeliy namayendisi boldi.