dilnur reyhan (chéxiye penler akadémiyesi sherqshunasliq inistituti, yawropa uyghur inistituti)

di’asporadiki birdinbir kespiy axbarat orgini bolghan »erkin asiya radi’osi« taqalghandin kéyin, uyghur axbaratchiliqi asasen palech halgha chüshüp qaldi. halbuki, pütün dunya arqa-arqidin yüz bériwatqan mustemlikiwi urushlar we irqiy qirghinchiliqlargha pétiwatqan we uyghur irqiy qirghinchiliqi dunya axbaratidin barghanséri öchüwatqan mushundaq bir xelq’araliq arqa körünüshte, özimizning musteqil we heqiqi menidiki kespi bir axbaratining otturigha chiqishi weziyitimizning teqezzasi bolup qaldi. yéqinqi yillardin béri, tahir imin teripidin qurulghan uyghur agénitliqi herxil tillarda uyghur weziyitini dunyagha yetküzüp kelgenidi, nöwette di’asporadiki gholluq ziyaliylar we erkin asiya radi’osining bir qsm munewwer muxbirlirining qétilishi bilen, »uyghur pochtisi« namida, kespiy bir médi’a bolush muddi’asi bilen otturigha chiqti. mes’uliyetchan, tereqqiyperwer we bir erkin dölitimizni arzulaydighan bir uyghur ziyaliysi bolush süpitim bilen, yéngi qurulghan bu uyghur médi’asini chin dilimdin tebrikleymen, téz arida küchlük, musteqil we kespiy bir médi’a bolup chiqishini, uyghur jem’iyitidiki herqandaq bir sezgür we tabu témilardin qachmaydighan, zaman tereqqiyatigha layiq erkin awazimiz bolalishi üchün aliy tileklirimni sunimen.

dilnur reyhan — uyghur jem’iyetshunas, uyghur heqlirini qoghdash pa’aliyetchisi, chéxiye penler akadémiyesi sherqshunasliq institutining aliy tetqiqatchisi, shundaqla yawropa uyghur institutining qurghuchisi we re’isidur. u firansiyening uyghur qirghinchiliqini étirap qilishini küchlük teshebbus qilghuchilarning biri. dilnur reyhan firansiye metbu’atlirida firansiye we xtay siyasiti hemde uyghurlarning nöwettiki weziyiti heqqide köpligen obzor we maqalilerni élan qilghan. u yene muhajirette uyghur medeniyitini qoghdash we yéngi ewlad uyghurlarning küchlinishini izchil qollap kelmekte. u nöwette firansiyening parizh shehiride yashaydu.