uyghur pochtisi, 11-féwral

istanbul

uyghur akadémiyesining bildürishche, «xelq’ara ana til küni» munasiwiti bilen, uyghur yashlirining ana tilda rawan sözlesh, erkin tepekkur qilish we öz idiyelirini jem’iyetke sunush iqtidarini ashurush meqsitide mexsus léksiye sözlesh musabiqisi uyushturulghan. uyghur ana til komitéti, uyghur akadémiyesi wexpi we serxillar ma’aripining birlikte teshkillishi bilen ötküzülidighan bu pa’aliyet «sehne sizning!» dep namlan’ghan bolup, nöwette mahirlarni tizimlitish bashlan’ghan.

musabiqe shertliri we qatnishish da’irisi

musabiqige toluq ottura mektep, aliy mektep (baklawur we magéstir) oqughuchiliri shundaqla jem’iyettiki barliq yashlar qatnishishqa teklip qilinidu. qatnashquchilarning özi qiziqidighan yaki tetqiq qilghan herqandaq sahe boyiche téma tallishigha ruxset qilin’ghan bolup, léksiyening TEDx formatida, yéngiche köz qarashlargha baghlan’ghan we ammibap bolushi telep qilinidu.

muhim waqit jedwili

musabiqige qatnishishni xalaydighanlar 2026-yili 2-ayning 17-künigiche tor arqiliq tizimlitip, léksiye mawzusi we qisqiche mezmunini sunushi kérek. teshkilligüchiler pa’aliyet süpitini saqlash üchün témilarni estayidil tallaydighanliqini, qobul qilin’ghanlargha 18-chislaghiche jawab bérilidighanliqini bildürgen. tallan’ghan mahirlarning sunum (Power Point) matériyallirini 19-chisla sa’et 17:00 giche ewetip bolushi shert qilin’ghan.

bahalash we mukapatlash

mahirlarning léksiyesi töwendiki töt tereptin bahalinidu:

  • idiyening yéngiliqliqi we qimmiti.
  • bayan qilish mahariti we tilning rawanliqi.
  • sehne ipadisi we yürüsh-turushi.
  • sunum matériyalliri bilen nutuqning maslishish ünümi.

musabiqide aldinqi üch derijige érishkenlerge ayrim-ayrim halda 7000 lira, 5000 lira we 3000 lira neq pul mukapati bérilidu.

pa’aliyet orni we waqti

musabiqining hel qilghuch basquchi 2026-yili 21-féwral küni istanbul sabahattin zayim uniwérsitétining (IZU) İSEFAM Abdullah Tivnikli yighin salonida ötküzülidu.

teshkilligüchi orunlar bu pa’aliyet arqiliq uyghur yashlirining öz-özige bolghan ishenchisini ashurush we ana tilda yuqiri sewiyelik bilim almashturush muhiti yaritishni ümid qilidighanliqini tekitlimekte.

jedwelni töwendiki adrstin köreleysz:https://docs.google.com/forms/d/e/1FAIpQLSe5z7369JNiiiUx6UiMuuCzjEzev_B8hSm5lUd175ArYbLz9g/viewform