14-yanwar
«uyghur pochtisi» (Uyghur Post) tori muhajirettiki uyghur siyasiy herikitining musapisini sistémiliq xatirilesh, arxiplashturush we awamgha tonushturush meqsitide, teshkilatlarning yilliq xizmet xulasilirini élan qilishni bashlidi. biz herqaysi teshkilatlarning ötken bir yilda élip barghan muhim pa’aliyetlirini «uyghur pochtisi» arqiliq jem’iyet bilen ortaqlishishni ümid qilimiz.
bu teshebbus teshkilatlar ara öz’ara chüshinishni kücheytish, qolgha keltürülgen netijiler arqiliq xelqimizge ümid we righbet béghishlash we uyghur dewasining netijilirini untulmas tarixiy höjjetke aylandurush qatarliqlarni meqset qilghan.
undaqta «uyghur heqlirini qoghdash qurulushi» (URAP) ning 2025- yili néme xizmetlerni qilghanliqigha nezer salayli.
2025- yili uyghur heqlirini qoghdash qurulushi (URAP) üchün alahide ünümlük we ghelibilik bir yil boldi. teshkilatning uzun yilliq siyasiy we diplomatik tirishchanliqliri bir qatar zor netijilerge érishti.
1. köchmenlerni orunlashturush we M-62 programmisi
2024- yili yanwardin bashlap yolgha qoyulghan «kanadagha 10,000 uyghur yötkesh» (M-62 pilani) 2025- yili öz méwisini bérishke bashlidi. 2025- yili apréldin étibaren tunji türkümdiki uyghurlar kanadagha yitip keldi. bolupmu, uyghur heqlirini qoghdash qurulushining kanada hökümiti bilen élip barghan izchil söhbetliri netijiside, tayland türmiside uzun yil qamalghandin kéyin xitaygha qayturulush xewpidin aman qalghan üch neper uyghur bixeter halda kanadagha orunlashturuldi.
2. a’ile jem bolush we idris hesenning qutquzulushi
marakeshte üch yildin artuq tutup turulghan idris hesenning amérikigha yötkilishidin kéyin, uyghur heqlirini qoghdash qurulushining kanada hökümiti bilen élip barghan alahide xizmetliri netijiside, idris hesen a’ilisi we baliliri bilen kanadada jem bolush hemde xatirijem yashash pursitige érishti.
3. xelq’araliq siyasiy tesir we G7 küntertipi
uyghur heqlirini qoghdash qurulushining küchlük türtkisi bilen, kanada hökümiti özining G7 riyasetchilik imtiyazidin paydilinip, xitayning «chégra halqighan basturush» qilmishlirini G7 rehberler yighinining küntertipige kirgüzdi. netijide, barliq rehberlerning ortaq imzasi bilen bu heqte küchlük bir bayanat élan qilindi.
4. resmiy salahiyet we toxtamname
2025- yili 1- maydin bashlap, uyghur heqlirini qoghdash qurulushi kanada köchmenler ministirliki teripidin M-62 pilani boyiche 10,000 uyghurni tonushturush salahiyitige ige resmiy hemkarlashquchi teshkilat süpitide étirap qilinip, resmiy toxtamname imzalandi.
5. bixeterlik tedbirliri we xitayning jazasigha jawab
2024- yili noyabirda xitay hökümiti uyghur heqlirini qoghdash qurulushi we uning ijra’iye diréktori memet toxti bashliq 12 xadimgha jaza élan qilghandin kéyin, kanada bixeterlik organliri mezkur teshkilat we uning rehberlirining kanada we dunya miqyasidiki bixeterlikini qoghdash üchün mexsus tedbirlerni yolgha qoydi.
6. qanun layiheliri we jaza tedbirliri
- mejburiy emgek: 2025- yili öktebirde «uyghur mejburiy emgikini cheklesh qanun layihesi» kanada parlaméntigha sunuldi.
- téxnika cheklimisi: uyghur heqlirini qoghdash qurulushi teyyarlighan qanuniy delillerge asasen, kanada hökümiti xitayning yuqiri téxnika shirkiti «xikwizhin» (Hikvision) gha jaza élan qildi we shirketning kanadadin chiqip kétishige buyruq chüshürdi.
7. parlaménttiki qobul qilish murasimi
2025- yili 19-noyabir, kanada parlaméntida yéngi kelgen uyghurlarni kütüwélish yighilishi ötküzüldi. bu pa’aliyetke besh siyasiy partiyedin 45 parlamént ezasi, besh ministir, amérika we teywen elchilirini öz ichige alghan 200 din artuq yuqiri derijilik zatlar qatnashti.
8. sherep we mukapat
teshkilatning ijra’iye diréktori memet toxti en’gliye padishahi charlis III ning textke olturush munasiwiti bilen tarqitilghan «padishah charlis taj kiyish mukapati» (King Charles III Coronation Medal) gha ériship, uyghur dewasining xelq’arada étirap qilinishi üchün muhim töhpe qoshti.
uyghur pochtisi bashqurush hey’iti (mudiriyti) uyushturghan.
neshrge teyyarlighuchi: tayir imin
