uyghur pochtisi, 26-féwral
2-ayning 22-küni, yekshenbe, amérikining wérjiniye shtatigha jaylashqan «méhriban ana» mektipi xelq’ara ana til bayrimi munasiwiti bilen daghdughiliq pa’aliyet ötküzdi. pa’aliyetke jama’et wekilliri, mektep oqutquchiliri, oqughuchilar we ata-anilar qatnashti.
pa’aliyet jeryanida, mektep oqughuchiliri uyghur tilida teyyarlighan shé’ir déklamatsiyeliri, sen’et nomurliri arqiliq özlirining milliy kimlikige bolghan iptixarliq héssiyatini namayen qildi.ata-anilar öz perzentlirining chüchük we tatliq uyghur tilida déklamatsiye qilghan edebiy eserliridin zoqlansa, köpchilik yéngi ewladning uyghur medeniyitini dawamlashturushqa bolghan intilishi we ishenchidin ümidlendi.
mektep terep éjtima’i taratqularda bu heqte toxtilip: «oqughuchilirimiz bügünni xushalliq we ghurur bilen toldurdi. biz ana tilimizni birlikte tebrikleymiz, birlikte qoghdaymiz we menggü birlikte yashnitimiz» dédi.
mektep mes’uli süriye xanim «uyghur pochtisi» gha qilghan sözide, köp yilliq tirishchanliqning ünümidin söyün’genlikini bildürüp mundaq dédi: «nechche yilliq ejirlirimizning méwisi süpitide, perzentlirimizning ana til sewiyeside zor ilgirilesh boldi. ularning teleppuzi, ahangi we jümle tüzüshliridin xuddi wetendiki eyni dewrdiki uyghur balilirining rawan tilini anglighandek bolisiz.»
bu pa’aliyet sürgündiki uyghur ewladlirining ana tilgha bolghan muhebbiti we bu tilning kelgüside yashnaydighanliqining muhim bir ispati bolup qaldi.
eskertish: uyghur pochtisi muxbiri mezkur pa’aliyetke biwaste qatnashmighan. mezkur xewer télfon ziyariti we taratqulardiki mezmunlargha asasen shlendi.
