uyghur pochtisi
tayir imin, 25-yanwar
wetenperwer ustaz abduréshit haji kérimi 2026-yili 24-yanwar shenbe küni kech sa’et 20:20 de, shiwétsiyening stokholm shehiride 83 yéshida köz yumup, biz bilen widalashti.
abduréshit haji kérimi «qara juldiki jeng» namliq esiri bilen tonulghan bolup, bu kitabta atush uyghurlirining xitay kommunist partiyesige qarshi élip barghan zor kölemlik qozghilang weqeliklirini, uninggha rehberlik qilghan axunup général we uning sépige qatnashqan muhim qehrimanlarning öchmes ish-izlirini muhajirettiki uyghurlargha tonushturghan.
u, yene shundaqla, sherqiy türkistan jumhuriyiti qurghuchiliridin biri, jumhuriyet re’isi élixan törining sherqiy türkistan jumhuriyiti heqqidiki eslimisi «türkistan qayghusi»ni özbékchidin uyghurchilashturup, élixan törem rehberlikide qurulghan sherqiy türkistan jumhuriyiti tarixini uyghurlargha tonutushta zor töhpe qoshqan idi.
abduréshit haji kérimi ilgiri ijtima’iy taratqularda özining neshrge teyyarlighan, emma téxi yoruq körmigen muhim esiri «hayat sepirimdiki ish-izlirim» heqqide tonushturush bergen idi. aptor bu eslime kitabida özining wetinidiki we musapirliqtiki hayatini tepsiliy bayan qilidu.
jama’et erbablirining teziyeliri:
eziz eysa elkün: «merhum wetenperwer ustazning rohi, uyghur üchün singdürgen büyük emgekliri we xushpé’il simasi qelbimizde menggü yashaydu. möhterem ustazni chongqur séghinish ichide yad étimiz. mushu munasiwet bilen merhumning a’ile-tawabi’atlirigha chin qelbimizdin sebir tileymiz»
abduréhim ghéni: «yatqan yéri jennette, axiretliki nur ichide bolsun. ustaz öz qelimi arqiliq tirildürgen tarixiy rohlar ewladlar qelbide menggü yashaydu.»
erkin sidiq: «abduréshit kérim akimiz bügün wapat boluptu. merhumgha allah rehmet qilsun! yatqan makani jennette bolsun!»
muherir: gülqiz
