uyghur pochtisi, 16-dékabir
amine sedef
14- dékabir istanbolning zeytinburnu rayonigha jaylashqan chirpiji baghchisi ammiwi pa’aliyet zalida eysa yüsüp alptékin wapatining 30- yili we uyghur hazirqi zaman tarixida «üch ependi» dep atalghan eysa yüsüp alptékin, mes’ut sabiri bayquzi we muhemmet emin bughra ni eslesh we tunutush pa’aliyti ötküzüldi.
eysa yüsüp alptékin wexpi, dunya uyghur qurultiyi wexpi, türk dunyasi tetqiqat wexpi, humay ana türk dunyasi ayallar birleshmisi qatarliq 11 teshkilatning hemkarliqida élip bérilghan mezkur pa’aliyetke köp sanda tetqiqatchilar, ziyaliylar, her qaysi ammiwi teshkilat wekilliri, aq partiye, iyi partiye, jumhuriyet xeliq partiyisi we milletchi heriket partiyisining wekilliri, shundaqla zeytinburnu rayonining hakimi qatarliqlar qatnashti.
pa’aliyet eysa yüsüp alptékin wexpining bashliqi jahit dak ependining échilish nutiqi bilen bashlandi. dunya uyghur qurultiy mu’awin re’isi we dunya uyghur qurultiyi wexpining ijra’iye mudiri abdureshit abdulhemit ependi, zeyitinburnu rayonining hakimi, doktor adem uslu qatarliqlar tebrik sözi qildi we bu pa’aliyetning ehmiyti heqqide toxtaldi.
hakim adem uslu ependi sözide mundaq dédi: «biz hélila anglighan we azraqla diqqet qilsaq chüshüneleydighan <sherqiy türkistan istiqlal marshi> <qurtulush yolida sudek aqti bizning qénimiz> dep bashlinip, <yashisun, ming yashisun, güzel istiqbalimiz> dep axirlashti. biz bu misralardin uyghurlarning bügün’giche élip bériwatqan küreshlirining yalghuz erkinlik üchünla emes, belki özini saqlap qélish üchün qiliniwatqan mewjutluq kürishi ikenlikini biliwalalaymiz.»
arqidin dunya uyghur qurultiyi re’isi turghunjan alawudun, dunya uyghur qurultiyi sabiq re’isi dolqun eysa, uyghur herikiti qurghuchisi rushen abbas qatarliqlarning tebrik sinliri qoyup ötüldi.
échilish we tebrik sözliridin kéyin humay ana türk dunyasi ayalliri birlikining qurghuchisi, pirofésor doktor mu’ella uyduyüjel xanim yétekchilikide «üch ependining hayati we ularning sherqiy türkistan dewasida oynighan roli» heqqide munazire yighin böliki bashlandi. yighinning bu qismida proféssor doktor ömerqul ependi «bir dölet erbabi bolush süpiti bilen mes’ut sabiri bayquzining hayati we pa’aliyetliri», doktor abdulla oghuz «sha’ir, yazghuchi, tarixchi, oqutquchi we muderris muhemmet emin bughraning hayati we eserliri», pirofésor doktor orhan kawunju «bir rehber süpitidiki eysa yüsüp alptékinning küresh hayati» dégen témilarda toxtilip, köz qarashlirini ilmiy pakitlar bilen tepsiliy otturigha qoyup ötti.
