uyghur pochtisi, 20-noyabir
kanada dunyada uyghur köchmenlirini yerleshtürüshni qanun’gha aylandurghan tunji dölet bolup, kanada parlaméntining töwen palatasi 2023-yil 1-féwral, 10 ming uyghur we bashqa türkiy musulman musapirlarni orunlashturushni telep qilidighan M62 teklipini bir awazdin maqullighan.
bügün kanada parlaméntida M62 qarari boyiche kanadagha yétip kelgen yéngi bir türküm uyghur köchmenlerni kütüwélish murasimi ötküzülüp, kanada hökümitining xitayning dölet halqighan basturushidin panahliq tilep kelgen bu uyghurlargha quchaq achidighanliqini namayan qilghan.
kanadadiki uyghur pa’aliyetchi, uyghur heqlirini qoghdash qurulushi teshkilatining mes’uli memet toxtining ijtima’iy taratquda bildürüshiche, murasimgha töt chong siyasiy partiyedin 42 parlamént ezasi, partiye rehberliri, kanada bash ministiri ishxanisining ikki yuqiri derijilik emeldari (bash sékrétar we ishxana mudiri), hazirqi hökümettin alte neper fédéral kabinét ministiri, töt neper sabiq ministir, shundaqla tashqi ishlar we köchmenler ministirliqining muhim emeldarliri qatnashqan bolup, ottawa, toronto, montré’aldin kelgen uyghur qérindashlar aktip ishtirak qilghan.
kanada parlaménti lébral partiye ezasi, M62 qanun layihesini sun’ghan semir zubeyir yighinda söz qilip, mezkur musapir uyghurlarni kanadagha yötkeshte aktip awaz qoshqan ministirlikler we uyghur teshkilatlirigha rehmet éytqan.
memet toxti mundaq dégen: «uyghur heqlirini qoghdash qurulushi teshkilatining kanadadiki küchlük tesiri yene bir qétim namayan boldi.»
söhbette yene kanadadiki uyghurlarning yéngi kelgen uyghurlargha méhmandostluq we qérindashliq méhrini yetküzgenliki tilgha élin’ghan.
