bügün ispaniyening barsilona shehiridiki katalan qelemkeshler jem’iyiti sha’ir tahir hamut izgilge bu yilliq erkin awaz Premi Veu Lliuremukapatini bergenlikini élan qildi.
2010-yili kataloniye qelemkeshler jem’iyiti teripidin tesis qilin’ghan bu mukapat öz yéziqchiliqi tüpeylidin türmige qamalghan yaki zulumgha uchrighan yazghuchilargha bérilidighan bolup, her yili 15-noyabir dunya mehbus yazghuchilar künige toghrilap tarqitilidiken.
bu yilliq mukapatning tahir izgilge bérilish sewebi heqqide, katalan qelemkeshler jem’iyitining bayanatida mundaq déyilgen: «uyghur sha’ir tahir hamut izgil özining ipadilesh erkinlikige bolghan mustehkem meydani we uyghur xelqining izzet-hörmitini qoghdashtiki tirishchanliqi hemde yuquri süpetlik eserliride es we musapirliq üchün awaz chiqarghanliqi sewebidin bu mukapatqa érishti.»
tahir izgil seper resmiyiti waqtida pütmigenliki üchün ispaniyege baralmay, mukapatni bügün torda ötküzülgen murasimda tapshurup alghan. u teshekkür sözide mundaq dégen: «katalan qelemkeshler jem’iyitining mushundaq alahide bir künde bu alahide mukapatni manga bergenlikige rehmet éytimen. bu sherep yalghuz mangila tewe bolup qalmastin, yighiwélish lagirlirida we türmilerde yétiwatqan, awazi boghulghan uyghur yazghuchi-sha’irlirighimu mensup. uyghurlarning milliy ési chekliniwatqan mushu peytte, yéziqchiliq ashu esning özige aylanmaqta; uyghurlarning milliy tili chekliniwatqan mushu peytte, ana tilda sözleshning özi qarshiliqqa aylanmaqta. shunga men öz eserlirim arqiliq éytilish cheklen’gen hékayilerni dawamliq sözleymen. men bügün érishken bu erkin awaz mukapati manga bizning yalghuz emeslikimizni yene bir qétim hés qildurdi.»
tahir izgilning «kéchide tutqun qilinishni kütüsh» namliq eslimisi 2023-yili awghustta in’glizche neshir qilin’ghandin kéyin, nahayiti tézla yigirmige yéqin tilgha terjime qilin’ghan bolup, katalan tilidiki nusxsimu bultur neshirdin chiqip, oqurmenler arisida küchlük tesir qozghighan.
«kéchide tutqun qilinshni kütüsh» namliq kitab 2023-yilliq amérika döletlik kitab obzorchiliri jem’iyitining jon l’éonard mukapatigha we 2024-yilliq mor kishilik hoquq yéziqchiliq mukapatigha érishken. tahir izgil yene 2024-yilliq waslaw xawél ijadiy ökte mukapatigha we 2024-yilliq shiwitsiye tomuzgha shé’iriyet mukapatigha érishken.
