уйғур почтиси
1-април
америка әдлийә министирлиқи сәйшәнбә күни (31-март) елан қилған байанатида, калифорнийә җәнубий районлуқ федератсийә районлуқ сот мәһкимисиниң бир сотчиси дүшәнбә күни буйруқ чүшүрүп, кейин америка тәвәликигә өткән икки кишиниң пуқралиқ салаһийитини бикар қилғанлиқини җакарлиди. сотчи ли чен (Li Chen) вә йү җу (Yu Zhou) исимлик әр-хотунларниң пуқралиқ салаһийитигә қанунсиз йоллар билән еришкәнлики һәққидә һөкүм чиқарған.
әдлийә министирлиқиниң байанатиға асасланғанда, бу әр-хотун пуқралиқ салаһийити бикар қилиништин илгири, сода сирини оғрилашқа тил бириктүрүш вә телеграф алдамчилиқи қилишқа тил бириктүрүш җинайитини етирап қилған. сот мәһкимиси бу икки җинайәтниң «әхлақий чириклик» түригә киридиғанлиқини, шуңа уларниң пуқралиққа өтүш үчүн зөрүр болған «йахши әхлақ-пәзиләт» шәртигә уйғун кәлмәйдиғанлиқини бекиткән. сот мәһкимиси йәнә, уларниң әхлаққа зийан йәткүзидиған җинайи қилмишларни садир қилғанлиқи вә җазани йениклитидиған һечқандақ алаһидә әһвал болмиғанлиқи үчүн, пуқралиққа өтүш салаһийитиниң йоқлиқини қарар қилған.
әдлийә министири пам бонди (Pam Bondi) байанатида мундақ диди:
«америка хәлқигә қарши еғир җинайәт өткүзгәндин кейинму йәнила пуқралиқ салаһийитигә еришәлигәнлик, көчмәнләр системимизни қобул қилғили болмайдиған дәриҗидә суйиъестемал қилғанлиқтур,йеқинда йүз бәргән бу пуқралиқтин чиқириветиш делолири, министирлиқимизниң пуқралиқ салаһийитиниң һәр вақит тиришип қолға кәлтүридиған бир имтийаз икәнликини, суйиъестемал қилинидиған һоқуқ әмәсликини капаләткә игә қилиш ирадисини көрситип бериду.»
әдлийә министирлиқиниң байанатида қәйт қилинишичә, ли чен вә йү җу америкиға киргән чағда хитай пуқраси иди. ли чен 2007-йили америка дөләтлик балилар дохтурханиси (NCH) капаләтчи болған H-1B кәспий хизмәт визиси билән америкиға киргән, кейин «пәвқулъаддә ихтисаслиқ хадим» салаһийити билән илтимас қилип даъимий туруш рухситигә еришкән. йү җуму 2008-йили NCH капаләтчиликидики H-1B визиси билән америкиға кәлгән; 2011-йили ли ченниң һәмраһи сүпитидә көчмәнлик салаһийитини тәңшәп даъимий туруш рухсити алған. ли чен 2016-йили, йү җу болса 2017-йили америка пуқралиқиға өткән.
2019-йили, бу әр-хотун NCH тәрипидин тәклип қилинип, «ексосом айриш» (exosome isolation) тәтқиқати билән шуғуллиниватқан мәзгилдә, теббий сода сирлирини оғрилиғанлиқи билән әйиблинип қолға елинған.
әйибнамигә асасланғанда, бу әр-хотун өзлири ширкәт қуруш вә башқа бир ширкәтниң пайчики болуш арқилиқ, NCH ниң сода сирлирини оғрилаш вә сетиштин шәхсий мәнпәъәткә еришкән. буниңдин башқа, уларниң иккилиси хитай хәлқ җумһурийити дөләтлик чәт әллик мутәхәссисләр идарисиниң йардәм пулиға еришкән.
әдлийә министирлиқиниң билдүрүшичә, бу икки киши ексосом айришқа мунасивәтлик билим мүлүк һоқуқини алмаштуруш арқилиқ, җәмъий 1.5 милйон долларға йеқин пайдиға еришкән. бу әр-хотун арқа-арқидин җинайитини тонуған вә 2021-йили җазаға тартилған. ли чен 30 айлиқ қамақ җазаси вә 3 йиллиқ назарәт астида қойуп бериш җазасиға, йү җу 33 айлиқ қамақ җазаси вә 3 йиллиқ назарәт астида қойуп бериш җазасиға һөкүм қилинған; буниңдин башқа, уларниң бирликтә 2.6 милйон доллардин артуқ төләм төлиши буйрулған.
