uyghur pochtisi
1-april
amérika edliye ministirliqi seyshenbe küni (31-mart) élan qilghan bayanatida, kaliforniye jenubiy rayonluq fédératsiye rayonluq sot mehkimisining bir sotchisi düshenbe küni buyruq chüshürüp, kéyin amérika tewelikige ötken ikki kishining puqraliq salahiyitini bikar qilghanliqini jakarlidi. sotchi li chén (Li Chen) we yü ju (Yu Zhou) isimlik er-xotunlarning puqraliq salahiyitige qanunsiz yollar bilen érishkenliki heqqide höküm chiqarghan.
edliye ministirliqining bayanatigha asaslan’ghanda, bu er-xotun puqraliq salahiyiti bikar qilinishtin ilgiri, soda sirini oghrilashqa til biriktürüsh we télégraf aldamchiliqi qilishqa til biriktürüsh jinayitini étirap qilghan. sot mehkimisi bu ikki jinayetning «exlaqiy chiriklik» türige kiridighanliqini, shunga ularning puqraliqqa ötüsh üchün zörür bolghan «yaxshi exlaq-pezilet» shertige uyghun kelmeydighanliqini békitken. sot mehkimisi yene, ularning exlaqqa ziyan yetküzidighan jinayi qilmishlarni sadir qilghanliqi we jazani yéniklitidighan héchqandaq alahide ehwal bolmighanliqi üchün, puqraliqqa ötüsh salahiyitining yoqliqini qarar qilghan.
edliye ministiri pam bondi (Pam Bondi) bayanatida mundaq didi:
«amérika xelqige qarshi éghir jinayet ötküzgendin kéyinmu yenila puqraliq salahiyitige érisheligenlik, köchmenler sistémimizni qobul qilghili bolmaydighan derijide suyi’éstémal qilghanliqtur,yéqinda yüz bergen bu puqraliqtin chiqiriwétish déloliri, ministirliqimizning puqraliq salahiyitining her waqit tiriship qolgha keltüridighan bir imtiyaz ikenlikini, suyi’éstémal qilinidighan hoquq emeslikini kapaletke ige qilish iradisini körsitip béridu.»
edliye ministirliqining bayanatida qeyt qilinishiche, li chén we yü ju amérikigha kirgen chaghda xitay puqrasi idi. li chén 2007-yili amérika döletlik balilar doxturxanisi (NCH) kapaletchi bolghan H-1B kespiy xizmet wizisi bilen amérikigha kirgen, kéyin «pewqul’adde ixtisasliq xadim» salahiyiti bilen iltimas qilip da’imiy turush ruxsitige érishken. yü jumu 2008-yili NCH kapaletchilikidiki H-1B wizisi bilen amérikigha kelgen; 2011-yili li chénning hemrahi süpitide köchmenlik salahiyitini tengshep da’imiy turush ruxsiti alghan. li chén 2016-yili, yü ju bolsa 2017-yili amérika puqraliqigha ötken.
2019-yili, bu er-xotun NCH teripidin teklip qilinip, «éksosom ayrish» (exosome isolation) tetqiqati bilen shughulliniwatqan mezgilde, tébbiy soda sirlirini oghrilighanliqi bilen eyiblinip qolgha élin’ghan.
eyibnamige asaslan’ghanda, bu er-xotun özliri shirket qurush we bashqa bir shirketning paychiki bolush arqiliq, NCH ning soda sirlirini oghrilash we sétishtin shexsiy menpe’etke érishken. buningdin bashqa, ularning ikkilisi xitay xelq jumhuriyiti döletlik chet ellik mutexessisler idarisining yardem puligha érishken.
edliye ministirliqining bildürüshiche, bu ikki kishi éksosom ayrishqa munasiwetlik bilim mülük hoquqini almashturush arqiliq, jem’iy 1.5 milyon dollargha yéqin paydigha érishken. bu er-xotun arqa-arqidin jinayitini tonughan we 2021-yili jazagha tartilghan. li chén 30 ayliq qamaq jazasi we 3 yilliq nazaret astida qoyup bérish jazasigha, yü ju 33 ayliq qamaq jazasi we 3 yilliq nazaret astida qoyup bérish jazasigha höküm qilin’ghan; buningdin bashqa, ularning birlikte 2.6 milyon dollardin artuq tölem tölishi buyrulghan.
