18-noyabir
uyghur pochtisi, amine sedef
stanbul-2- noyabir sherqiy türkistan jumhuriyet küni. bu kün uyghurlargha ghurur we iptixar élip kelgen muqeddes kün bolup, dunyaning herqaysi jayliridiki uyghurlar özliri yashighan döletlerde herxil usullar da bu künni tebrikleydu. türkiyediki uyghurlarmu her yildikige oxshash mul pa’aliyet mezmunliri bilen bu künni debdebilik tebrikleshti.
12- noyabir küni istanbuldiki türkiye uyghur teshkilatlar munbiri, sherqiy türkistanliqlar fédératsiyesi, xelq’ara sherqiy türkistan teshkilatlar birliki, dunya uyghur qurultiyi wexpi we sherqiy türkistan ölimalar birliki, uyghur akadémiyesi wexpi… qatarliq 19 teshkilat, weqip we jem’iyetlerning hemkarliqida istanbulning zeytinburnu rayonidiki kazlicheshme kültür merkizide 1933- yili 12- noyabir qeshqerde qurulghan sherqiy türkistan islam jumhuriyitining 92- yili we 1944- yili 12- noyabir ghuljida sherqiy türkistan jumhuriyitining 81- yili istanbuldiki 500 din artuq uyghurlarning qatnishishi bilen daghidoghiliq xatirilendi.
bu qétimliq xatirlesh pa’aliyiti 2025- yili 11- ayning 12- küni kech sa’et :6:00 de qur’an kerim tilawiti bilen bashlandi we sherqiy türkistan milliy marshi bilen türkiye istiqlal marshi oquldi. arqidin sherqiy türkistan ölimalar birliki re’isi dotsént alimjan bughda ependi échilish sözi qildi. arqidin nöwet bilen her qaysi teshkilat, waqip we jem’iyetlerning wekilliri qisqa shekilde özlirining yürek sözlirini qilip ötti.
türkiye uyghur teshkilatliri munbiri re’isi we sherqiy türkistanliqlar fédératsiyesi re’isi imir
hesen ependi, dunya uyghur qurultiyi mu’awin re’isi we dunya uyghur qurultiyi weqpi re’isi abduréshit ependi, jama’et erbabi abduqadir yapchan ependi , teshkilatlar birliki re’isi musajan er, ölimalar birlikidin alimjan bughda, sherqiy türkistan teshkilati re’isi elishir ependi, nuzugum a’ile jem’iyitidin minewer öz’uyghur xanim qatarliqlar ikki jumhuriyet heqqide ayrim-ayrim söz qildi.
pirogrammida yene ana til mektepliridiki umaqlar we yashlar shé’ir déklamatsiye qildi. axirida dunya
uyghur qurultiyi mu’awin re’isi we dunya uyghur qurultiyi weqp re’isi abduréshit ependi bashchiliqida bir muhakime yighini boldi. muhakime yighinigha uyghur tetqiqat énstituti mudiri dotsént erkin ekrem, sherqiy türkistan ölimalar birliki re’isi dotsént alimjan bughda, darul’iman akadémiyesi idare hey’et ezasi doktor awaz’axun nurmuhemmet we sutuq bughraxan weqpi konya tarmiqi re’isi doktor abduréhim dölet qatarliq tetqiqatchilar özlirining sherqiy türkistan jumhuriyetlirining qurulush we yiqilish jeryanlirini tilgha élish bilen birge, xitaygha qarshi milliy musteqilliq herikitimiz heqqide toxtulup, yighin ehlini qimmetlik melumat bilen teminlidi. uningdin bashqa yene, yash ösmürlirimizning sherqiy türkistan jumhuriyetlirige béghishlan’ghan edebiyat numurlirighimu orun birildi.
bu künde enqeridimu oxshashla tebriklesh pa’aliyti élip bérilghan bolup, enqerediki uyghurlar türkiyening gholluq siyasiy partiyeliri we türk teshkilatliri bilen birlikte bu künni xatirilidi. uyghur akadémiyesi wexpi we sherqiy türkistan tetqiqat wexpining birlikte teshkillishi bilen, enqerediki iz méhmanxanisida élip bérilghan bu pa’aliyetke türkiyening hakimiyet béshidiki adalet we tereqqiyat partiyesi, yéngi yol partiyeler gorohi, enqere sheherlik hökümet, türk ochaqliri, ezerbeyjan azafli ijtima’iy hemkarliq jemi’iyiti, süriye türkmen teshkilatliri fédiratsiyesi we jenubiy türkistan özbek teshkilatliri qatarliq türkiyening gholluq siyasiy partiyeliri, türk we türk dunyasi teshkilat rehberliri we türk muxbirlar bolup 40 tin artuq serxil kishiler qatnashti.
uningdin bashqa yene, 12- noyabir küni qeyseriydiki yüzligen uyghurlarmu bir arigha kilip bu künni
qutlidi. bu pa’aliyetke yazghuchi, zhurnalist taha kélich ependi we sa’adet partiyesi bashliqi mehmut
arikan ependilermu qatnashti.
amine wayit sedef
