medine bawudun
men yéqinda bélgiyede ötküzülgen «uyghur sen’et féstiwali»gha teklip bilen qatniship, güzel tuyghular we chongqur tesirler bilen amérikigha qaytip keldim. ikki kün dawam qilghan bu féstiwalgha 500 din artuq kishi qatniship, pa’aliyetke intayin yuqiri baha bérishti.
mezkur féstiwal firansiyediki «miras» teshkilati teripidin uyushturulghan. teshkilat qurghuchisi nasime xanim qazaqistandiki uyghur tiyatirining sabiq sen’etkarliridin biridur. u hemrahi ezimet ependi bilen birge firansiyege köchüp yerleshkendin kéyin, öz kespige bolghan ishtiyaqidin waz kechmey, «miras» teshkilatini qurup chiqqan. ular yillardin buyan uyghur sen’itini yawropada tonushturush üchün izchil xizmet qilip, bir qanche qétim türlük tiptiki sen’et féstiwallirini muweppeqiyetlik ötküzüp kelgen.
féstiwalgha qazaqistandin ataqliq sen’etkar artur ilahunof bashchiliqidiki zulpiqar zayitof, shaxmurat bahamof we faruza jalalowa, shuningdek yawropadin möminjan hemde muxtar janbaz qatarliq sen’etkarlar qatnashti. bélgiye we etraptiki döletlerdin kelgen uyghur jama’iti bu sen’et kéchisige yuqiri baha bérip, sen’etkarlarni qizghin alqishliri bilen tebriklidi. sen’etkarlar tamashibinlargha untulmas we rohni urghutidighan bir sen’et kéchiligini sowgha qildi.
xelq söygen sen’etkar artur ilahunof özi ijad qilghan «kök böre», «qelbimde sen» qatarliq naxshiliri bilen tamashibinlarning güldiras alqishlirigha érishti. sen’etkar artur ilahunof sehnide söz qilip: « bügünkidek ömlükimiz, ittipaqliqimiz we birlikimiz yükselsun; sen’itimizning türtkiside xelqimiz jem bolup, ulughwar ishlarni qilishqa allah nesip qilsun! qeyerde bolayli, allah herqachan bizge yar bolsun!» dégen sözliri bilen féstiwal qatnashquchilirigha alahide meniwi xushalliq béghishlidi.
féstiwalda uyghur muqamliri we xelq naxshiliri sen’etkarlirimiz teripidin wayigha yetküzülüp orunlandi. heqiqeten, güzel bir naxsha insan’gha peqetla güzel tuyghu béghishlapla qalmay, belki bir milletni ittipaqlashturidighan küchke igidur; güzel bir naxsha qelblerni bir-birige baghlaydighan we ümidke yétekleydighan qudretke ige; sen’et — millet rohining sadasi, qelbning tilidur.
uyghur sen’itimiz boghuluwatqan, naxshilirimiz chekliniwatqan mushu künlerde, uyghur medeniyiti we sen’itini qoghdash her bir uyghurning muqeddes burchidur.
hemmidin méni xushal qilghini, féstiwalda yash, ataqliq sen’etkar shaxmurat bahamof men yazghan «atamni séghindim» we «biz qérindash» namliq naxshilarni orunlap, keng jama’etning güldiras alqishlirigha érishkini boldi.
bir sha’ir üchün öz ijadiyitining xelq teripidin söyülüp, qizghin alqishigha muyesser bolushidin artuq xushalliq bolmisa kérek. xelqimning alqishliri méni téximu güzel ijadiyetlerni yaritishqa righbetlendürüsh bilen birge, ijadiyet yolumda manga zor küch-quwwet boldi.
