uyghur pochtisi, 3-mart
washin’gton rayonidiki aldinqi qatardiki yehudiy teshkilatliridin biri bolghan adas isra’iliye jama’iti (Adas Israel Congregation), uyghur qirghinchiliqini toxtitish xelq’araliq herikitining sadiq bir awazigha aylandi. ötken hepte ular yene her ayning axirqi peyshenbe küni xitayning washin’gtondiki elchixanisi aldida élip baridighan izchil namayishini dawamlashturdi.
uyghur kishilik hoquq qurulushi ijra’iye diréktori ömer qanat ependi téléfon ziyaritimizni qobul qilip mundaq dédi:
«adas isra’iliye teshkilatining uyghurlar eng éghir kün’ge duch kelgende biz bilen bir septe turup élip barghan bu namayishliri heqiqeten kishini tesirlendüridu. ular qish-yaz, issiq-soghuq démestin, héchnémige qarimay xitay hökümitige ‘uyghur qirghinchiliqini toxtat!’ dep towlimaqta. téxi hazirghiche dunyaning héchqandaq yéride, hetta birer uyghur teshkilatimu bunche izchilliq bilen namayish élip barmighan.»
adas isra’iliye ezaliri özlirining ziyankeshlikke uchrash we wetindin mejburi ayrilshtek tarixiy kechürmishlirige tayan’ghan halda, uyghur xelqi bilen bir septe turushni özlirining chongqur mes’uliyiti dep qarimaqta.
ötken yili, adas sra’il uyghur taymizning ziyaritini qobul qilghanda mundaq dégen:
«biz namayishlirimizda sherqiy türkistanda dawamlishiwatqan irqiy qirghinchiliqqa qarshi awaz chiqirish, uyghurlar bilen turush we guahliq bérish zörüriyitige bolghan qet’iy ishenchimizni namayan qilimiz. yehudii bolush süpitimiz bilen, bizni bir millet, bir medeniyet we bir din süpitide yoqitishqa urun’ghan, esirler boyi dawamlashqan tarixiy eslimilirimizni untumaymiz. biz musapiretchilikte yashashning néme ikenlikini bilimiz. shundaqla, bundaq zulumlargha qarshi turushta ittipaqdashlarning biz bilen bir septe turushining neqeder muhimliqini roshen tonup yétimiz. biz her bir insanning hayatini pütün bir dunyagha barawer dep qaraymiz. bu dunyalarni weyran qilishqa bolghan urunushlar bizning inkas qayturushimizni telep qilidu. biz qolimizdin kélishiche bu naraziliq namayishlirini dawamlashturushimiz kérek.»
xitay hökümitige shuni körsitip qoyush kérekki, kishiler uyghur xelqini unutqini yoq we ularning xitay hökümiti teripidin uchrawatqan insan qélipidin chiqqan mu’amililirini téximu köp kishler tonup yetmekte. biz buning ehmiyitige ishinidikenmiz, namayishimizni dawamlashturimiz we qolimizdin kélidighan barliq usullar bilen uyghurlarni qollaymiz
