uyghur pochtisi, 24-féwral
amérika awam palatasining re’isi mayk jonson (jumhuriyetchi, lu’izanna shitatidin) xitayda yette yildin köp waqittin béri türmide yétiwatqan uyghur doxtur gülshen abbasning qizi ziba muratni seyshenbe küni ötküzülidighan «dölet ehwalidin melumat» (SOTU) nutuqigha alahide méhman süpitide teklip qildi.
ziba muratning anisi doxtur gülshen abbas 2018-yilidin béri xitayda tutqun qilin’ghan. ziba murat we uning hammisi roshen abbas xanimlar uzundin buyan ashkara halda, gülshen abbasning tutqun qilinishini — roshen abbasning xitayning uyghurlargha qaratqan keng kölemlik qamaqqa élish we mejburiy emgek qatarliq zulumlirigha qarshi pa’aliyetlirige qaritilghan bir xil öch élish, dep qarap kelmekte.
mayk jonson «The Hill» gézitige bergen bayanatida mundaq dédi: «2018-yili, doxtur gülshen abbas- uning a’ile ezaliri xitay kompartiyesining uyghur musulmanlirigha qaratqan rezil mu’amilisi heqqide söz qilip bir qanche kündin kéyin, shinjang uyghur aptonom rayonida xitay kompartiyesi teripidin mejburiy tutqun qilindi we qolgha élindi.»
u yene sözini dawamlashturup: «biz xitayning nsan heqliri depsendichiliklirini xelq’ara jem’iyetning diqqet merkizige élip kélish we naheq tutup turuluwatqanlarning hemmisini qoyup bérishke chaqirishni dawamlashturuwatqan peytte, doxtur gülshen abbasning qizi ziba muratni pirézidént trampning dölet ehwalidin melumat bérish nutqigha méhman süpitide teklip qilish men üchün shereptur» dédi.
ziba murat we uning anisining ehwali ilgirimu awam palatasi xitay ishliri alahide komitéti we bashqa qanun tüzgüchiler teripidin tekitlinip kelgen idi.
«dölet ehwalidin melumat» (State of the Union) nutqi — amérika pirézidéntining her yili dölet mejliside amérikining nöwettiki weziyiti we yilliq xizmet pilani heqqide béridighan alahide doklatidur. bu munasiwet bilen ötküzülidighan yighin’gha pirézidént we dölet mejlisi ezaliri özliri köngül bölidighan muhim sahelerge wekillik qilidighan alahide méhmanlarni teklip qilidu.
