uyghur pochtisi, 30-yanwar
washin’gton –amérikida yashawatqan uyghur köchmen isma’ilning köchmenler idarisi teripidin tutup turulushi sewebidin, uning besh balisi we ayali éghir iqtisadiy qiyinchiliqta qaldi. jem’iyet ezaliri mexsus yardem chaqiriqi élan qilip, barliq qérindashlarni bu qiyin künlerde mezkur a’ilige yardem qolini sunushqa, saxawet we birlik rohi bilen medetkar bolushqa chaqirdi.
isma’il amérikida 10 yildin béri qanunluq köchmen süpitide yashap kéliwatqan bolup, u ayali we besh balisining halidin birdinbir xewer alghuchisi idi. besh balisining töti amérikida tughulghan. u yük mashinisi shopuri bolup ishlep a’ilisini béqip kelgen, emma yéshil karta resmiyetlirining téxi tamamlinip bolmasliqi sewebidin xizmitini toxtitishqa mejbur bolghan. yéqinda köchmenler idarisi teripidin tutulghan isma’ilning qamaqta yatqinigha ikki ay boldi.
yéqinda ötküzülgen sotta, isma’ilning héchqandaq jinayi xatirisi yoqluqi we qoyup bérishke bolidighanliqi étirap qilin’ghan bolsimu, emma amérikidiki köchmenlik délolirining köplüki we resmiyetlerning murekkepliki sewebidin, uning erkinlikke chiqishi yene bir nechche ay kéchikishi mumkin.
éghir iqtisadiy krizis
isma’il tutulghandin béri, a’ilining kirim menbesi pütünley üzülüp qaldi. besh balining anisi bolghan ayali nareside balilirigha yalghuz qarash bilen bir waqitta, kündilik turmush chiqimlirini qamdashta amalsiz qalmaqta. gerche ayalining ata-anisi qolidin kelgenche yardem qiliwatqan bolsimu, lékin öy ijarisi, tok, su, yémek-ichmek we mashina qerzi qatarliq turmush chiqimliri bilen birge, jiddiy boluwatqan adwokatliq heqlirini tölesh üchün zor miqdarda mebleghke éhtiyaj tughulghan.
uyghur islam merkizining chaqiriqi
uyghur islam merkizi élan qilghan yardem chaqiriqida mundaq deydu: «nöwette nurghun uyghur a’ililiri türlük qiyinchiliqlarni we rohiy zerbilerni bashtin kechürmekte. isma’ilning a’ilisi hemishe qanun’gha ri’aye qilip, halal méhnet bilen yashap kelgen. bügünkidek qiyin peytte, yardemning az-köplikidin qet’iynezer, jem’iyitimizdiki saxawetchilerning birlikte yardem bérishi bu a’ilining hazirqi qiyinchiliqlardin ötüwélishi üchün intayin muhimdur.»
bu chaqiriq nöwette uyghur jama’iti arisida zor diqqet qozghimaqta.
