уйғур почтиси, 30-йанвар
вашингтон –америкида йашаватқан уйғур көчмән исмаъилниң көчмәнләр идариси тәрипидин тутуп турулуши сәвәбидин, униң бәш балиси вә айали еғир иқтисадий қийинчилиқта қалди. җәмъийәт әзалири мәхсус йардәм чақириқи елан қилип, барлиқ қериндашларни бу қийин күнләрдә мәзкур аъилигә йардәм қолини сунушқа, сахавәт вә бирлик роһи билән мәдәткар болушқа чақирди.
исмаъил америкида 10 йилдин бери қанунлуқ көчмән сүпитидә йашап келиватқан болуп, у айали вә бәш балисиниң һалидин бирдинбир хәвәр алғучиси иди. бәш балисиниң төти америкида туғулған. у йүк машиниси шопури болуп ишләп аъилисини беқип кәлгән, әмма йешил карта рәсмийәтлириниң техи тамамлинип болмаслиқи сәвәбидин хизмитини тохтитишқа мәҗбур болған. йеқинда көчмәнләр идариси тәрипидин тутулған исмаъилниң қамақта йатқиниға икки ай болди.
йеқинда өткүзүлгән сотта, исмаъилниң һечқандақ җинайи хатириси йоқлуқи вә қойуп беришкә болидиғанлиқи етирап қилинған болсиму, әмма америкидики көчмәнлик делолириниң көплүки вә рәсмийәтләрниң мурәккәплики сәвәбидин, униң әркинликкә чиқиши йәнә бир нәччә ай кечикиши мумкин.
еғир иқтисадий кризис
исмаъил тутулғандин бери, аъилиниң кирим мәнбәси пүтүнләй үзүлүп қалди. бәш балиниң аниси болған айали нарәсидә балилириға йалғуз қараш билән бир вақитта, күндилик турмуш чиқимлирини қамдашта амалсиз қалмақта. гәрчә айалиниң ата-аниси қолидин кәлгәнчә йардәм қиливатқан болсиму, лекин өй иҗариси, ток, су, йемәк-ичмәк вә машина қәрзи қатарлиқ турмуш чиқимлири билән биргә, җиддий болуватқан адвокатлиқ һәқлирини төләш үчүн зор миқдарда мәбләғкә еһтийаҗ туғулған.
уйғур ислам мәркизиниң чақириқи
уйғур ислам мәркизи елан қилған йардәм чақириқида мундақ дәйду: «нөвәттә нурғун уйғур аъилилири түрлүк қийинчилиқларни вә роһий зәрбиләрни баштин кәчүрмәктә. исмаъилниң аъилиси һәмишә қанунға риъайә қилип, һалал меһнәт билән йашап кәлгән. бүгүнкидәк қийин пәйттә, йардәмниң аз-көпликидин қәтъийнәзәр, җәмъийитимиздики сахавәтчиләрниң бирликтә йардәм бериши бу аъилиниң һазирқи қийинчилиқлардин өтүвелиши үчүн интайин муһимдур.»
бу чақириқ нөвәттә уйғур җамаъити арисида зор диққәт қозғимақта.
