тәрҗимә қилғучи: таһир имин уйғурийан
кеннис рос (кишилик һоқуқни көзитиш тәшкилатиниң сабиқ иҗраъийә директори):
«мән уйғурлар һәққидә соримақчи. сиздин бурунқи башлиқ мишел башлет »хитайниң уйғурларға қарши инсанийәткә қарши җинайәтләрни садир қилғанлиқини испатлайдиған« наһайити күчлүк доклатни елан қилғаниди. сиз вәзипигә олтурғандин буйанқи өткән үч йилда, бир қетимму хитайниң уйғурлар үстидики инсанийәткә қарши җинайәтлирини әйибләп бақмидиңиз. бирақ бүгүн көпчиликниң алдида, сиз буни әйибләмсиз, тәнқидләмсиз, йаки қандақ қилсиңиз мәйли, уйғурларға қарши натоғра муъамилиләрни әйибләмсиз? өзиңизниң тили бойичә, мишел башлет елан қилған инсанийәткә қарши җинайәт өткүзүш еһтималлиқи бар дегән доклатниң мәзмунини тәкитләп өтәмсиз?»
волкер түрк:
«мән у доклатқа пүтүнләй қошулимән. мән буни ашкара дәп кәлдим; қанчә қетим ашкара ипадә билдүргәнликимни билмәймән. шундақ, доклат елан қилинди, бирақ кишилик һоқуқ кеңиши у доклатқа асасән бирәр қарар чиқармиди. силәргә мәлум болғандәк, у доклат – б д т кишилик һоқуқ кеңишидә мәғлубийәткә учриди.
шундақ, мениң истратегийәм хитай һөкүмити билән сөзлишиш, қайта-қайта, үзлүксиз сөзлишиш. пәқәт шинҗаңдики бу иш һәққидила әмәс, бәлки йәнә хитайниң башқа җайлиридики хоңкоң, тибәт вә пуқралар саһәси қатарлиқлар тоғрисида сөһбәтлишидиған пурсәтләрни издәш. биз хитай билән наһайити җанлиқ сөһбәтләрни өткүздуқ, һәр дәриҗилик әмәлдарлар билән.
бу сөһбәтләрниң биз һәммимиз үмид қилған өзгиришкә елип бериш-бәрмәсликигә кәлсәк, илгириләш наһайити аста. шундақ, мән бу сәвәбтин һәқиқәтән бәкла бинәзәр. бу иш үстидә биз бар күчимиз билән тиришиватимиз. растини дегәндә, техиму көпрәк иш қилишимиз үчүн қолимизда йетәрлик малийә күчи йоқ. бу бизниң хизмитимизниң муһим бир қисми. биз тиришчанлиқимизни давам қилимиз, бу доклатқа қарита мениң һечқандақ қарши пикрим йоқ.»
