uyghur pochtisi, 24-noyabir
amine sedef
5- noyabir türkiyening herqaysi jayliridin kelgen yash tetqiqatchilar istanbuldiki sabahittin zayim uniwérsitétida ehmiyetlik bir uchrishishta jem boldi.
bu uchrishish 8- qétimliq yash tetqiqatchilar ilmiy muhakime yighini bolup, türkiyening herqaysi jayliridin kelgen her sahe, her kesipte ilgirilewatqan yash tetqiqatchilar öz kespi saheside mol mezmunluq tetqiqat maqalilirini we doklatlirini sundi.
yighinda échilish sözi qilghan uyghur akadémiyesi aliy ma’arip komitéti mudiri nametjan memet orxun bu qétimqi yighinning 2011- yilidin bashlap qerellik ötküzülüp kéliwatqanliqini we 2017- yili 7- qétimliqi ötküzülgendin kéyin toxtap qalghan yash tetqiqatchilar ilmiy muhakime yighinining dawami ikenlikini, bu yighinning türkiyediki uyghur aspirantlar we yéngidin xizmetke chiqqan tetqiqatchilar üchün özlirining eserlirini tonushturush, pikir almashturush we ilmiy tetqiqat qilishni öginish pursiti bilen teminleshni meqset qilghanliqini tekitlep ötti.
yighinda uyghur akadémiyesi mu’awin re’isi we uyghur akadémiyesi wexpe re’isi abdulhemid qaraxan uyghur akadémiyesi re’isi rishat abbas ependining salimini yetküzüsh bilen birge, 2011- yilidin 2017- yilghiche qerellik élip bérilghan uyghur yash tetqiqatchilar muhakime yighinining weten sirtida doktor we magistirliqta oquwatqan yashlargha özini ipadilesh pursiti yaritip, qabil yashlarning otturigha chiqishigha, shundaqla, bu yashlarning bir qismining sherqiy türkistan musteqilliq kürishining aldinqi sepliride xizmet qilishigha supa yaritip bergenlikini eskertip ötti. abdulhemid qaraxan sözide yene, bu türlük xizmetlerning sistémiliq élip bérilishi üchün dosént nametjan emet orxon bashchiliqida uyghur akadémiyesi aliy ma’arip komitétining qurulghanliqini élan qildi.
bu qétimqi tetqiqat yighinida oxshimighan kesiptiki sekkiz yash tetqiqatchi doktor borhan ulughyol, nuriddin izbasar we memtimin begtimur qatarliq ustazlarning riyasetchilikide, özlirining aldin teyyarlighan maqalilirini sundi.
bu muhakime yighinida sunulghan maqaliler:
- uyghurlarda pisxika éngini yuqiri kötürüshning zörüriyiti (ilahiyet penliri tetqiqatchisi kamile fazil)
- molékola derijiside yaxshilan’ghan gélokosidaz aktipliqi bilen yéngi bir bi’ologiyelik indikator üstide izdinish (bi’ologiye penliri doktori sulayman hakim)
- xoten islam hökümiti: sherqiy türkistan siyasiy sehnisi (tarix penliri magistiri rehime tursun)
- körünmes azab: séstiraliq kespide ölüm qayghusi bilen küresh qilish (séstira mukerrem muhemmet’imin)
- sherqiy türkistan jeditchilik herikitining uyghur edebiyatigha körsetken tesiri (türkologiye penliri magistiri sübhinur ömerjan)
- ikkinchi bir til öginishte ana tilning roli (in’gliz tili oqutquchisi meryem muxter)
- uyghur tébabitide aq késelni dawalash we kelgüsi yüzlinishler (tére késellikliri tetqiqatchisi, doktor abdulkerim satuq bughra)
- tokta toqulghan nikél oksid, nano talalarning derijidin tashqiri bataréyelerde qollinilishi (fizika penliri magistiri rizwan’gül abdulla)
amine sedef- uyghur pochtisining türkiye stanbulda turushluq muxbiri, u di’aspora, uyghur ayalliri, medeniyet sahesde yazidu.
