uyghur pochtisi, 11-féwral

washin’gton – amérika asiya tetqiqat jem’iyiti (AAS) 2026-yilliq terjime we edebiyat mukapatlirining netijisini élan qildi. browin uniwérsitétining dotsénti, tarixchi we terjiman joshua friymén (Joshua Freeman), dangliq uyghur sha’iri tahir hamut izgilning «kéchide tutqun qilinishni kütüsh» (Waiting to Be Arrested at Night) namliq esirini uyghur tilidin in’gliz tiligha yuqiri süpette terjime qilghanliqi üchün, nupuzluq «petrik d. henin terjime mukapati»gha (Patrick D. Hanan Prize for Translation) layiq körüldi.

mukapat heqqide

amérika asiya tetqiqat jem’iyiti (AAS) teripidin tarqitilidighan petrik d. henin terjime mukapati (Patrick D. Hanan Prize for Translation) ikki yilda bir qétim bérilidighan bolup, xitay tili yaki ichki asiya tilliridin in’gliz tiligha terjime qilin’ghan eng muhim eserlerge bérilidu. bu qétimqi mukapat uyghur edebiyatining xelq’araliq tesirini ashurushta muhim ehmiyetke ige. mukapat tarqitish murasimi 2026-yili 13-mart kanadaning wankuwér shehiride ötküzülidighan AAS yilliq yighini jeryanida élip bérilidu.

tahir hamut izgilning tebriki

eserning aptori tahir hamut izgil ijtima’iy taratqularda tebrik sözi élan qilip mundaq dédi:

«joshua friyménning bu mukapatqa érishkenlikini qizghin tebrikleymen! uning bu kitabni terjime qilishqa singdürgen ejri we yaratqan terjime süpiti bu mukapatqa tamamen layiq.»

mezkur eserning in’glizche nusxisi élan qilin’ghandin buyan, xelq’ara edebiyat saheside küchlük inkas qozghap kelmekte. dunyadiki nupuzluq taratqular we edebiyat tenqidchiliri eserning qimmitige yuqiri baha bérish bilen birge, joshua friyménning terjime maharitige alahide apirin oqumaqta. joshua friyménning terjimisi tékistning esli jewhirini we uyghur tilidiki nazuk tuyghularni in’gliz tilida toluq eks ettürüp béreligenliki bilen yuqiri alqishqa érishti. tenqidchiler uning terjimisini «rawan, tesirlik we esli nusxining rohigha sadiq» dep bahalighan bolup, bu xil süpet mezkur eserning gherb dunyasida keng tarqilishidiki eng muhim amillarning birige aylandi.