uyghur pochtisi 15-dékabir

nechche yillardin béri, özlirining lagir we xitaymning atalmish terbiyelesh merkezliridiki hayat kechmishlirini xelq’ara jama’etke sözlep, dunyagha xitayning uyghur we bashqa türkiy xelqlerge qaratqan basturush we irqiy qirghinchiliq siyasetlirini bildürüp kelgen lagir shahitliridin ömerbék ali, tursun’ay ziyawudun, zumret dawut, qelbinur sidiq qatarliqlar »uyghur pochtisi«ning qurulghanliqini tebriklidi we bu yéngi taratquning uyghurlarning awazi bolushini ümid qilidighanliqlirini bildürüshti.
qelbinur sidiq mundaq dédi: «men bir jaza lagiri shahidi bolush süpitim bilen «uyghur pochtisi» ning qurulghanliqini qizghin tebrikleymen. hazirqidek xitay hakimiyiti özining uyghurlargha yürgüziwatqan irqiy qirghinchiliqini yoshurush, dunya we xelq’arada shermendichilikini yépish üchün her xil yalghan sehne yasap, yalghan teshwiqatlarni küchep tarqitiwatqan halqiliq bir peytte, uyghur tilidiki, kespiyleshken we ishenchilik axbarat bolghan «uyghur pochtisi»ning qurulushi muhajirettiki uyghurlargha heqiqiy uchurlarni del waqtida yetküzüsh üchün intayin muhim, shundaqla tarixiy ehmiyetke ige. bu tartquning qurulushi wetinimizdiki charisiz qalghan shu xelqimizge xeyrlik bolsun.»
zumret dawut mundaq dédi: « ‘uyghur pochtisi’ jem’iyitimiz üchün rastchil xewer, paydiliq uchur, sewiyelik mezmun teminleydighan muhim bir menbe bolghusi. »uyghur pochtisi«da xizmet qiliwatqan barliq japakeshlerning emgikige utuq, ishlirigha muweppeqiyet, yoligha beriket tileymen.»
tursun’ay ziyawudun mundaq dédi: «’uyghur pochtisi’ning qurulghanliqidin nahayiti xosh boldum. bu taratqu bizning awazimizni, wetinimizdiki xelqimizning awazini we xitayning zulumini chékiwatqan qérindashlirimizning awazini anglitishta chong rol oynaydu dep qaraymen. xitay yalghan teshwiqatini kücheytip, dunyani aldashqa uruniwatqan bir peytte, ‘uyghur pochtisi’ning qurulghanliqidin bek xosh boldum.»
ömerbék ali mundaq dédi: «uyghurlarning awazi öchüwatqan mushundaq bir peytte, özimizning taratqusining barliqqa kélishi bek muhim. men ‘uyghur pochtisi’ning bizning herikitimiz üchün paydiliq hemde qolimizgha qol, putimizgha put bolalalaydighanliqigha ishinimen.»