«uyghur pochtisi»ning qurulghanliqini tebrikleymen, ejir singdürgen qérindashlargha aliy éhtiram bildürimen
nöwette uyghur xelqi duch kéliwatqan qiyinchiliqlar köp tereplimilik bolup, bularning biri – özliri uchrawatqan bésim we zulum toghrisida öz-ara uchur alalmasliq, shundaqla bu heqtiki peryadlirini dunya jama’etchilikige anglitalmasliqtur. buning sewebi éniqki, sherqiy türkistanda axbarat erkinliki pütünley cheklen’genliktindur.
xitay kommunist partiyisi (x.k.p.) hökümiti barliq muxbirlarni we taratqu organlirini kontroli astigha élip, peqet partiyening yalghan teshwiqatlirini tarqitishqa mejburlimaqta. shuning üchün, héchqandaq axbarat orgini yaki muxbir erkin halda uchur igilesh we heqiqiy xewerlerni élan qilish hoquqigha ige emes. x.k.p. hakimiyiti sherqiy türkistanda élip bériwatqan irqiy qirghinchiliq we insaniyetke qarshi jinayetlirini mexpiy élip bérip, dunya jama’itidin yoshurup kelmekte. buning netijiside dunya bu jinayetler heqqide yéterlik uchurgha érishelmeywatidu.
mushundaq jiddiy weziyette, «uyghur pochtisi»ning otturigha chiqishi xushallinarliq bir ish bolup, uyghur xelqining axbarat sahesidiki chong boshluqni qismen bolsimu toldurushta we heqiqetni yetküzüshte halqiliq rol oynishini hemde sherqiy türkistan xelqining yangraq awazi bolushini ümid qilimen.
men «uyghur pochtisi»ning qurulushini tebriklesh bilen birge, uni qurup chiqqan mes’ul we barliq xizmetchi xadimlirining xizmetlirige utuq tileymen.
cheksiz hörmet we aliy éhtiram bilen, musajan er sherqiy türkistan ma’arip we hemkarliq jem’iyiti re’isi – istanbul
