aptori: zulfiye mesiméliyéwa
«uyghur awazi» géziti
muherrirdin: mezkur maqale qazaqistanda neshr qilinidighan «uyghur awazi» gézitide élan qilin’ghan. «uyghur pochtisi» ottura asiya uyghurlirining hayati heqqide keng di’aspora jama’etchilikige xewer bérish üchün, maqalining jümle qurulmisi we söz-atalghulirini ortaq edebiy til ölchimige yéqinlashturup, formatini tengshep qayta élan qildi. esli aptor we menbe saqlap qélindi.
yéqinqi mezgillerdin buyan, sen’etke ishtiyaq baghlighan oqughuchilar we yashlarning öz talantlirini namayan qilishigha purset yaritip béridighan bir qatar sen’et féstiwalliri ötküzülmekte. bu jehette, «alamet» ijadiyet sen’et merkizining mudiri, jumhuriyetlik «shebnem» uyghur ijadkar ayallar jem’iyitining re’isi qelbinur arupning aktip teshkillesh iqtidarini alahide tilgha élishqa erziydu.
yéqinda p. chaykowiskiy namidiki almuta muzika inistitutining qollishi bilen ötküzülgen «qelbimde sen’et» körik-féstiwali ene shundaq ehmiyetlik pa’aliyetlerning biri boldi. uyghur «on ikki muqam»ini tertipke salghuchi meshhur sen’etkar amannisaxan namigha béghishlan’ghan bu nupuzluq naxsha-muzika musabiqisi milliy chalghu eswablar, sehne mahariti we ussul qatarliq yönilishler boyiche élip bérildi. pa’aliyetke almuta we yarkent sheherliri, shundaqla uyghur we emgekchi qazaq nahiyeliridin kelgen 300 ge yéqin oqughuchi qatnashti.
féstiwalning tennetnilik échilish murasimida, inistitut oqughuchiliri öz maharetlirini körsitip, körürmenlerning qizghin alqishigha érishti. naxsha we milliy chalghu eswablar mahariti basquchi tamamlan’ghandin kéyin, méhmanlargha söz nöwiti bérildi. sheherlik muzika inistitutining oqutquchisi qanibék asilbékuli söz qilip, qatnashquchilargha illiq tileklirini bildürdi we ularning kelgüsige utuq tilidi.
jumhuriyetlik anilar kéngishining re’isi zoram awutowa xanim pa’aliyet heqqide toxtilip mundaq dédi:
«bügünki sen’et körikige qatnashqili kelgen yash talantlarni körüp, ewladlirimizning xelqimiz sen’itige, medeniyitige we tarixigha bolghan muhebbitining cheksiz ikenlikini hés qilduq. chünki ular her bir naxshining menisini chongqur chüshinip, milliy chalghular bilen yuqiri sewiyede orundap chiqti. sözlerning éniq teleppuz qilinishi we awaz da’irisining kengliki ularning sistémiliq teyyarliq bilen kelgenlikini körsitip turuptu.»
musabiqe jeryanida, talantliq yashlar ana-weten, ata-ana we a’ile témilirigha béghishlan’ghan, mezmuni chongqur naxshilarni orundidi. «dostluq», «sebde», «ghunche» we «xush nawa» qatarliq milliy chalghular ansambilliri xelq naxshiliri we «on ikki muqam» terkibidiki parchilarni yangratti. pa’aliyet axirida, bir qisim teshkilat rehberliri teripidin ansambil yétekchilirige teshekkürnamiler we pexriy namlar teqdim qilindi.
sehne mahariti yönilishide, kichik aqsu yézisidin kelgen oqughuchilarning qazaq xelqining meshhur sha’iri muqa’ali maqatayéwning «aqqular uyquda» namliq esiri asasida teyyarlighan tiyatiri körürmenlerde alahide tesirat qaldurdi.
ussul basquchida bolsa, yekke we guruppa ussulliri ayrim bahalandi. elmira seydulla’éwa, rehmetjan yoldashéw we nazugum téyipowa qatarliq tejribilik ussul ustazliri bahalashqa qatnashti. «ewlad», «esel», «barna», «malika», «amannisa shou», «dilnaz», «fi’ésta» we «irade» qatarliq ansambillar, shundaqla «ruxsare» we «kelechek» ussul studiyeliri yuqiri maharet körsitip, bahalighuchilarning yuqiri bahasigha érishti.
pa’aliyet axirida, musabiqige qatnashqan héchqandaq mahir quruq qol qayturulmidi. ghaliblargha alahide longqilar we qimmetlik sowghilar bérildi. shundaqla, ansambil yétekchilirige «shebnem» jem’iyitining «medeniyet elchisi» médali tapshuruldi.
teshkilligüchi qelbinur arup söz élip, pa’aliyetni qollighan barliq jem’iyet ezalirigha, adil bahalighan hey’etlerge we riyasetchi irade memtke alahide rehmet éytti.
«qelbimde sen’et» féstiwali uyghur yashlirining sen’etke bolghan ishtiyaqini we ijadiyet yoshurun küchini yene bir qétim namayan qildi. bu pa’aliyet peqet bir musabiqila bolup qalmastin, belki yash talantlarni qollaydighan we ularning öz-özige bolghan ishenchisini ashuridighan muhim supa bolup qaldi.
