uyghur pochtisi, 18-mart
amérika alem qatnishi idarisi 12-mart «artémis 2-nomur»luq ayni aylinip uchush wezipisini bahalash teyyarliqini tamamlighanliqini bildürüp, qoyup bérish teyyarliq xizmitini dawamliq ishlise bolidighanliqini békitken, nöwette 4-ayning 1-künidin burun qoyup bérish pilanlan’ghan.
«artémis 2» (Artemis II) wezipisi nasaning mezkur rakétasi tunji qétim adem toshuydighan wezipe bolup qalidu. bu guruppa ezaliri 50 yildin köprek waqittin buyan aygha seper qilidighan tunji kishiler bolup hésablinidu. amérika alem qatnishi idarisi (nasa) ötken hepte , eng baldur bolghanda 1-aprél küni töt alem uchquchisini köpchilik uzundin buyan kütken ayni chöridep uchush sepirige ewetishni pilanlawatqanliqini bildürdi.
10 künlük bu wezipide, nasa alem uchquchiliri réd waysmen (Reid Wiseman), kiristina kok (Christina Koch) we wiktor glowér (Victor Glover) shundaqla kanada alem uchquchisi jérémiy xansén (Jeremy Hansen) din terkib tapqan guruppa ezalirining ayni chöridep uchushi hemde ilgiriki herqandaq insan’gha qarighanda yer sharidin téximu yiraqqa seper qilishi kütülmekte. alem uchquchiliri nöwette xyustondiki nasa jonson alem boshluqi merkizide meshiq qilmaqta. ular qoyup bérishtin ilgiri mikroplar bilen uchrishishni cheklesh üchün, charshenbe küni shu yerde karantin’gha kirishke orunlashturuldi. nasa tekshürüsh yer yüzi sistémisi programmisining dériktori shan ku’in (Shawn Quinn) ning sözige asaslan’ghanda, eger hemme ish pilan boyiche bolsa, alem uchquchiliri 27-mart küni kénnédi alem boshluqi merkizige baridu.
amérika alem qatnishi idarisi 19-mart «alem boshluqigha qoyup bérish sistémisi» namliq rakéta we «ori’on yultuz türkümi» namliq alem kémisini filorida ishtatidiki kénnidi alem qatnishi merkizining qurashturush binasidin qoyup bérish supisigha élip chiqip, qoyup bérish üchün eng axirqi teyyarliqni qilishni pilanlighan. pilan boyiche qoyup bérish-bermeslik yenila qalghan teyyarliq xizmetlirining ilgirlesh ehwaligha baghliq.
nasa yéqinda özining «artémis» (Artemis) ay shari pilanida zor tengshesh élip baridighanliqini élan qildi. «artémis 2» din kéyin, organning eslidiki pilani «artémis 3» wezipisi arqiliq 2028-yili alem uchquchilirini aygha qondurush idi. emma, bu wezipe hazir 2027-yilining otturilirigha orunlashturuldi hemde u töwen yer orbitisida qélip téxnika sinaqlirini élip baridu. bu sinaqlar SpaceX we Blue Origin shirketliri soda xaraktéride yasighan bir yaki ikkila aygha qonush üskünisi bilen uchrishish we tutashturush meshghulatlirini öz ichige alidu.
menbesi: amérika en n b si xewerliri
