uyghur pochtisi, 4-noyabir
wirjiniye shitatining 2025-yilliq waliyliq saylimi 4-noyabir kechte ötküzülidu. bu saylam wezipe mudditi toshqan jumhuriyetchi waliy glén yangkinning ornigha adem tallash bolup, tunji ayal waliyning saylinishi éniq bolghachqa, bu saylam tarixiy ehmiyetke ige. trampning syasetliri bu saylam netijisge biwaste tesr körstidu, shunga bu saylam memliket boyiche jiddi közitilmekte.
namzatlar:
bu saylamda ikki dangliq ayal bir-birige reqib bolmaqta:
- démokrat abigayil spanbérgér (Abigail Spanberger): ilgiriki amérika awam palatasining ezasi we merkiziy axbarat idarisi (CIA) ning xadimi bolup, u merkezge mayil solchil yüzlinish bilen saylam teshwiqati élip barmaqta.
- jumhuriyetchi winsom érl-siyers (Winsome Earle-Sears): hazirqi yardemchi waliy bolup, konsérwatip we amérika déngiz armiyesining péshqedem jengchisi. eger u saylansa, u amérikidiki tunji qara tenlik ayal waliy bolup qalidu.
asasliq siyaset nuqtiliri
saylam pa’aliyiti asasliqi iqtisad we medeniyettiki talash-tartishliq nuqtilarni chöridigen bolup, pütün döletning nöwettiki siyasiy keypiyatini ekis ettürmekte:
- iqtisad we turmush tennerxi: dimokratchi spanbérgér iqtisadiy mesililerge ehmiyet bérip, tramp hökümiti yolgha qoyghan siyasetlerning turmush tennerxi we saqliqni saqlashqa körsetken tesirini tenqid qilmaqta. jumhuriyetchi érl-siyersmu iqtisadni tilgha alidu, emma bajni töwenlitish we karxanilargha dostane muhit yaritishqa téximu ehmiyet béridu.
- bala chüshürüsh : dimokratchi spanbérgér ayallarning bala chüshürüsh hoquqini qollaydighanliqini qet’iy tekitlidi, bolupmu wirjiniye shitati jenubtiki bala chüshürüsh qattiq cheklenmigen birdinbir shitat bolup qalghanliqtin, u bu mesilini otturigha qoymaqta. jumhuriyetchi érl-siyers bala chüshürüshke qarshi turidu, emma saylam pa’aliyitide bu mesilini anche köp tilgha almay, spanbérgérgha purset berdi.
- medeniyet témiliri: jumhuriyetchi érl-siyers »medeniyet urushi« mesililirini, jümlidin jinis özgertküchi (Transgender) lerning ayallar tenterbiye musabiqilirige qatnishishigha qarshi turidighanliqini ilgiri sürdi, bu xil istratégiye hazirqi jumhuriyetchi waliyning saylamda ghelibe qilishigha yardem bergenidi.
wirjiniyening siyasiy mayilliqi
wirjiniye shitatining siyasiy mayilliqi küchlük riqabetchan halette turmaqta. gerche fédératip sewiyede (yeni prézidént saylimida), shitat 2008-yildin buyan izchil démokratlarni qollap, «kök» (démokrat) shitatqa aylan’ghan bolsimu, yerlik we shitat derijilik saylamlarda ehwal téximu murekkep bolmaqta.
waliyliq saylimi buning asasliq körsetküchi. 2021-yildiki saylamda, jumhuriyetchi kandidat glén yangkin démokratchilargha mayil bolushqa bashlighan bu shitatta kütülmigen halda ghelibe qilip, wirjiniyening partiyeler nöwetliship turush en’enisini saqlap qalghanidi. bu, shitat puqralirining prézidént bilen qarshi partiyedin waliy saylinishqa mayil ikenlikini körsitidu.
shitat mejlisi (qanun chiqirish orgini) ni hazir démokratlar kontrol qilmaqta; ular kéngesh palatasida 21-19, awam palatasida 51-49 netije bilen azraq üstünlükni igilidi.
xulase: wirjiniye hazir «bölün’gen hökümet» halitide turmaqta. jumhuriyetchiler waliyliq ornini tutsa, démokratlar qanun chiqirish orginini kontrol qilmaqta. shitatning omumiy mayilliqi «démokratlargha mayil» (Lean Blue) bolsimu, yéza rayonliridiki jumhuriyetchilerning küchlük asas bolushi sewebidin, u yenila qattiq riqabetlishishchan (Swing State) shitat hésablinidu, her bir saylam netijisi pütünley özgirip kétish éhtimalliqi yuqiri.
teyyarlighuchi: tahir imin uyghuri’an
