uyghur pochtisi, 27-mart 

resim menbesi: beydu jyaxaw (Baidu Jiahao)  

shinxua agéntliqining 2026-yili 26-marttiki xewiride déyilshiche, xitay kompartiyesi merkiziy komitéti we gowuyüenning testiqlishi bilen, qeshqer wilayiti tewelikide sénling (岑岭) nahiyesi resmiy tesis qilin’ghan. uyghur aptonom rayonluq xelq hökümiti tor békitidiki uqturushta körsitilishiche, yéngidin qurulghan sénling  nahiyelik xelq hökümiti «shinxua» bazirigha jaylashqan.

igilinishiche,  bu bazarning ilgiriki nami kudi yézisi bolup, bu yiza 2025-yili «yézidin bazargha özgertish» jeryanida xitayche «shinxua» namini alghan, aridin bir yil ötmeyla yéngi nahiyening memuriy merkizige aylan’ghan. 

resmiy menbelerde, sénling nahiyesining qurulush meqsiti memuriy bashqurush ünümini ashurush we chégra mudapi’e bixeterlikini kücheytish dep izahlan’ghan. péngpey xewerliri (澎湃新闻) qatarliq taratqularning qeyt qilishiche, bu rayonni ayrim nahiye qilip tesis qilish arqiliq memuriy mulazimetni ahalilerge yéqinlashturush we G219 dölet yoli (新藏公路 shinjang-tibet tashyoli) liniyesini «emeliy bashqurush» nishanlan’ghan. shuning bilen birge, bingtüen toridiki uchurlarda bu özgirishning «bingtüen bilen yerlikni bir gewdileshtürüsh» siyasitining bir qismi ikenliki tilgha élin’ghan. 

xitay hökümitining uyghurlar zich olturaqlashqan rayonlargha yéngi xitayche namda nahiye tesis qilishi yéngi ehwal emes bolup, buningdin burunmu xoten wilayiti tewelikide xé’en(和安县) we xékang(和康县) nahiyeliri mushundaq usulda qurulghan idi. közetküchilerning qarishiche, tarixiy uyghurche yer namlirining ornigha xitayche namlarni bérish we yéngi memuriy birliklerni tesis qilish — rayonning medeniyet kimlikini özgertish, nopus qurulmisini xitaylashturush we herbiy-memuriy kontrolluqni yuqiri kötürüsh istratégiyesining muhim bir qedimidur. nöwette sénling nahiyeside asasiy qatlam hökümet apparatliri resmiy ish bashlighan bolup, rayonning memuriy xeritiside zor özgirish hasil qilin’ghan.