uyghur pochtisi, 25-mart
ihsan umun
22-mart küni firansiyening paytexti parizhda, yawropa uyghur institutining teshkillishi bilen, mezkur inistitutning yéngidin ishqa kirishtürülgen xizmet binasida tentenilik halda noruz bayrimini tebriklesh pa’aliyiti ötküzüldi. mezkur pa’aliyet inistitutning xizmet binasi resmiy ishqa kirishkendin buyanqi tunji qétimliq noruz tebriklesh yighilishi bolup, yawrupadiki uyghur jama’iti arisida tesir qozghidi.
pa’aliyetke yawropa uyghur instituti tarmiqidiki uyghur tili mektipining oqughuchiliri, parizh we etrapidiki sheherlerde yashaydighan uyghurlar, shundaqla uyghurlarning kishilik hoquq we medeniyet kürishini qollap kéliwatqan firansuz aktiwisit we ziyaliylar qatnashti.
bayramliq pa’aliyet jeryanida, uyghur tili mektipining oqughuchiliri teripidin teyyarlan’ghan türlük sen’et nomurliri orundaldi. uyghur milliy usulliri, weten we erkinlik témisidiki shi’ir déklamatsiyeliri hemde en’eniwi uyghur naxsha-muzikiliri yighin ehlige mol bir medeniyet ziyapiti sundi. pa’aliyet jeryanida yene uyghurlarning en’eniwi bayram ta’amliri méhmanlargha sunuldi.
inistitut xizmet binasining medeniyet qorghini bolush roli
bu qétimliq pa’aliyetning eng jelp qilarliq teripi, uning parizhning merkizide qurulghan yawropa uyghur inistitutining xizmet binasi ichide élip bérilghan tunji noruz pa’aliyiti bolushidur. yawropa uyghur instituti teripidin uzun yilliq tirishchanliq we jem’iyetning maddiy-meniwi qollishi bilen qolgha keltürülgen bu xizmet binasi, firansiyediki uyghurlarning milliy kimlikini saqlap qélish, tilini öginish we medeniyitini yat ellerge tonushturushtiki muhim bir merkez süpitide bahalanmaqta.
yawropa uyghur inistitutining mudiri dilnur reyhan ziyaritimiz jeryanida bu yilqi noruzning firansiye uyghurliri üchün alahide hisaplinidighanliqini éytip mundaq dédi:«tunji qétim, öz binarimizda, noruz we roza héytni tebrikliduq. noruzgha kelgen uyghurlarmu bek xushal boldi. gerche, her yili ijare élip ötküzidighan zallardek chong bolmisimu, yenila öz yérimizde tebrikleshning huzuri bashqa dep oylaymen.»
yawropa uyghur instituti (IODE) 2019-yili qurulghan bolup, firansiye we yawropada uyghur medeniyiti, tili we tarixi boyiche akadémik we ijtima’iy tetqiqatlarni élip bérish we uyghur qirghinchiliqini yawrupada tonutush bilen birge, uyghur tili mektipi arqiliq yash ewladlarning ana tilini untup qalmasliqi üchün xizmet qilmaqta. parizhdiki bu xizmet binasi bolsa, uyghur xelqi béshidin kechürüwatqan éghir krizis mezgilide, muhajirettiki uyghurlarning rohiy meditgahi we medeniyet uchrishish nuqtisi bolush rolini jari qildurmaqta.
