uyghur pochtisi, 25-öktebir
meshhur uyghur iqtisadshunasi we adalet teshebbuschisi proféssor ilham toxti 2025-yili 10-ayning 25-küni 56 yashqa kirdi. uning bu tughulghan küni dawamliq xitay türmiside ötmekte. 2014-yili muddetsiz qamaqqa höküm qilin’ghan toxti ependining ehwali we uning erkinliki heqqidiki chaqiriqlar xelq’ara jem’iyetning küntertipidin yenila chüshmidi.
2014-yili 15-yanwardin bashlap türmide yétiwatqan ilham toxtining salametlik ehwali we körüshüsh ehwali heqqide hazirghiche xitay da’iriliri teripidin resmiy, ishenchlik melumat bérilmigen. uning a’ile-tawabi’atlirining yoqlishi cheklen’gen yaki üzülüp qalghan bolup, xelq’ara jama’etchilik uning hayati we ehwalidin intayin endishe qilmaqta.
«saxarof mukapati» qatarliq xelq’araliq on nechche mukapatning sahibi ilham toxtining 56 yashqa kirgenliki munasiwiti bilen, dunya miqyasidiki kishilik hoquq teshkilatliri, parlamént ezaliri we uning qizi jewher ilham qatarliqlar birlikte xitay hökümitidin toxtini derhal shertsiz qoyup bérishni telep qildi.
jewher fayis buk hésabigha mundaq yazghan:
«jinim dadam! qedirlik, eng qedirlik dada! sizning yene bir qétim eng yaxshi köridighan qara kastyum-burulkingizni kiyip aldimda turushingizni qanchilik arzu qilimen! sizning yene bir qétim qizghinliq bilen ders ötüp, awazingizning karidorning u chétigiche yangrap ketkenlikini anglashni arzu qilimen! sizning dostliringiz bilen yene bir sheherdin yene bir sheherge wélisipit minip sayahitingiz üchün shunchilik hayajanlan’ghanliqingizni körüshni arzu qilimen! sizning yéningizda turup, yene bir qétim tughulghan küningizni tebrikleshni arzu qilimen.
men bu künlerning tézdin qaytip kélishi üchün her küni tengrige du’a qilimen we qattiq küresh qilimen.
jénim dada, bügün siz 56 yashqa kirgen tughulghan küningiz. bizning bu alahide künni bille ötküzüp, sizni tebrikliyeliginimizge 12 yil bolghanliqini hés qilish intayin azapliq.
bügün, men tengrige yene bir qétim du’a qilimen— peqet sizning saghlamliqingizning yaxshi bolushi we a’ilimizge aman-ésen qaytip kélishingiz üchünla emes, belki tengrining sizge mezmutluq, merdaniliq, sewrchanliq we adaletsizlikke qarshi dawamliq küresh qilish jasaritini üzlüksiz ata qilishi üchün du’a qilimen. amin.»
teyyarlighuchi: tahir imin uyghuri’an
