uyghur pochtisi, 25-noyabir
hebibulla izchi
türkiye metbu’atlirining 22- noyabérdiki xewiride bildürülishiche, istanbul saqchiliri xitay jinayetchilirining xelq’araliq qachaqchiliq torini tarmar qilghan.
istanbul saqchi idarisi köchmenler we qachaqchiliqigha qarshi turush tarmiqi xeterlik yüklerni tekshürüwatqanda, yük taq ichidin gumanliq ikki pasport yoshurun’ghanliqini bayqighan. tekshürüsh netijiside, pasportlarning saxta ikenliki we shuninggha oxshash usullar bilen teyyarlan’ghan nurghun höjjetlerning bashqa yük oralmilirigha yoshurun’ghanliqi ashkarilan’ghan.
bu weqede, xitayliq jinayetchilerni türkiye arqiliq amérikigha yötkeydighan, xitay teripidin bashqurulidighan bir qéchish tori teshkilati ashkarilan’ghan. bu teshkilatning her bir adem üchün 10 ming dollar heq bilen jinayetchi xitaylarni istanbulgha élip kilidighanliqi, andin saxta höjjetler arqiliq bashqa döletlerge yolgha salidighanliqi éniqlan’ghan bolup, bu qachaqchilar teshkilatini tekshürgende, türk tatliq yémeklikliri, posulkilar we hetta su istakanlirigha yoshurun’ghan nurghun saxta höjjetler qolgha chüshürülgen.
saqchilar bu yüklerning menbesini tekshürüsh arqiliq yükni élip mangghan toshughuchi muhemmet’eli qudret isimlik bireylenni qolgha alghan we uni soraq qilghan. soraq jeryanida muhemmet’eli qudret u yükni istanbulning arnawutköy nahiyesige yéqin bir xitay er-xotundin tapshuruwalghanliqini bildürgen. saqchilar buninggha asasen arnawutköydiki belgilen’gen rayonning etrapini qorshap tekshürgen.tekshürüshte, xitay teripidin bashquruludighan bir xelq’araliq qachaqchiliq teshkilati pash qilinip, 15 neper xitay puqrasi qolgha élin’ghan we neq meydandin saxta dep qaralghan 27 dane kimlik kartisi we 58 dane pasport musadire qilin’ghan.
tekshürüsh jeryanida, bu qachaqchiliq teshkilati jazagha uchrash xewpi yuqiri bolghan yaki gherp döletlirige wiza alalmighan xitay puqralirini her bir adem üchün 10 ming dollardin pul élip istanbulgha ekilidighanliqi, bu yerde saxta höjjetler yasap, bu xitay qachqunlirini esli pasportliri bilen ispaniyening madrid shehirige yötkeydighanliqi, andin madird shehride xitay pasporti we höjjetlirini tashliwétip, saxta pasportlar bilen méksikigha élip baridighanliqi, axirida méksikidin amérikigha piyade ötküzüdighanliqi ashkarilan’ghan bolup, nöwette, bu teshkilatning türkiye we yawropadiki shaykiliri jiddi tekshürülmekte iken.
