uyghur pochtisi, hebibulla izchi
24. 03. 2026
noruz bayrimi uyghurlarning uzaq tarixiy tereqqiyatlar jeryanida medeniyet berpa qilish we medeniyet özleshtürüsh asasida shekillendürgen, ammiwiy asasi küchlük, qedimilikke, omumiyliqqa ige yerlik we milliy alahidilik mujessemlen’gen en’eniwi bayramlirimizning biri.
noruz, eslide parische söz bolghan newroz sözining uyghur tilidiki özgergen wariyanti bolup, söz menisi jehettin «bahar yamghuri», «tunji bahar küni», « köklem küni» dégen menilerni bildüridu. bu bayram shemsiye kaléndari boyiche qish axirliship, baharning bashlinish küni yeni her yili 3-ayning 21-küni kün bilen tün tengleshken bash baharning birinchi küni ötküzilidu. noruz bayrimi esli mahiyiti bilen yéngi yil bayrimi bolup, bu en’eniwiy bayram bizning turmush aditiditimizde intayin chong tesirge ige.
noruzda kishilerde peyda bolidighan meniwiy xushalliq we debdebilik, jushqun ijtima’iy keypiyat eng yuquri pellige chiqidu. pütün yurt we mehelle – köy boyiche bayram tentenisige chömülidu. öylerde beriket, molluqqa simwol qilin’ghan noruz éshi étilip, meydanlargha dashqazan ésilidu. xelq noruz seylisi qilip, neghme – nawa we xoshalliq bilen baharni yeni noruzni kütüwalidu. xelq meydanlargha toplunup at beygisi, oghlaq tartishish, chewgan top, chélishish qatarliq türlük tenterbiye pa’aliyetliri uyushturup, meydanlargha darwazliq sehniliri we sarghaydilar quruludu, yash yigitler, sombul chachliq qizlar dar arghamchilirida we pirqirap chörgilewatqan sarghaydilarda maharet körsütüdu.
ene shu qutluq künde, dunyaning her qaysi jayliridiki uyghurlar bu yilmu birge yétip kelgen roza héyt we noruz bayrimini tebriklep pa’aliyetler ötküzgen bolup,gérmaniyede dunya uyghur qurultiyi medeniyet komtétiti we uyghur yawropa medeniyet merkizining birlikte teshkillishi, gérmaniye miyunxén yashlar meshripining orunlashturushida, miyonxénda roza héyti we noruz bayrimiliq pa’aliyet ötküzülgen. pa’aliyetke miyonxéndiki uyghur jama’iti, fransiye, bélgiye, shiwitsariye, türkiye we bashqa jaylardin kelgen méhmanlar bolup 200 din jiq kishi qatnashqan.
bu pa’aliyette, uyghur yawropa medeniyet merkizining orunlishida, gérmaniye, gollandiye, norwégiye,en’giliye, türkiye qatarliq döletlerdin kelgen sen’etkarlar uyghur medeniyet -sen’itidin nomurlarni teqdim qilghan.
shiwitsariyede– shiwitsariye uyghur jemiyitining teshkillishide, shiwitsariyediki uyghurlar bir yerge jem bolup roza héyti we noruz bayrimini tebrikligen.
norwégiyede– 20-mart roza héyt küni, norwégiye uyghur jemiyiti, we uyghur yawropa medeniyet merkizining birlikte orunlashturushida, birlikte yétip kelgen roza héyt we noruz bayrimini tebriklep pa’aliyet orunlashturulghan. bu pa’aliyetke 300 din jiq kishi qatnashqan.
shiwitsiyede– shiwitsiye uyghur birlikining teshkillishide 20 – mart küni, roza héyt we birge yétip kelgen nozur bayrimini tebriklep pa’aliyet orunlashturulghan.
en’giliyede– en’giliye paytexti londonda 22-mart küni, en’giliyediki uyghur yashliri teripidin birge yétip kelgen roza héyt we noruz tebriklen’gen.
kanadada paytexti torontoda– kanada sherqiy türkistan jemiyiti we uyghur heqlirini qoghdash teshkilati teripidin, kanadagha m62 programmisi ichide yéngidin kelgen uyghurlarni kütüwélish we yéngi kelgen qérindashlar bilen kona uyghurlarning bir yerge jem bolushida roza héyt we noruz bayrimi tebriklen’gen.
özbekistanda-özbekistan uyghur medeniyet merkizining teshkillishide, özbékistan paytexti tashkentte roza héyti we noruz bayrimi tebriklen’gen bolup, bu yighilishta 90 yashqa kirgen dilber appayning uyghur muhajiritini we özbékistandiki uyghurlarni milli en’enisi we kimlikini qoghdash heqqide qilghan sözliri yüreklerni titretken.
qazaqistanda-qazaqistan uyghurliri her qaysi yurtlardiki yigit béshilarning teshkillishide jem bolup, roza héyt we noruz bayrimini tebrikligen.
amérikida– amérika uyghur birleshmisining teshkillishide 21-mart küni, uyghur mediniyiti ,yéngilinish we mensupluq namida roza héyt we noruz bayrimi munasiwiti bilen tebriklesh pa’aliyiti ötküzülgen.
türkiyede– 21-mart küni, türkiyede pa’aliyet élip bériwatqan dunya uyghur qurultiyi wexpisi we bashqa sherqiy türkistan teshkilatlirining ortaq sahipxanliqida istanbulda opche héytlishish pa’aliyiti ötküzülgen.
awustraliyede– awustraliye uyghur jemiyitining teshkillishide, besh parlamént ezasi,her qaysi xelq’ara teshkilatlarning mes’ulliri we 100 din artuq awustraliyede yashawatqan uyghurlarning qatnishishida, awustraliye paytexti sédnéyda roza héyt we noruz bayrimini tebriklesh pa’aliyiti ötküzülgen
