uyghur pochtisi
1-april
awstraliyediki MMH fondi jem’iyiti (MMH Foundation) türkiyede tarix kespide oquwatqan éhtiyajliq uyghur yashlirini qollash we uyghur tarixshunasliqini rawajlandurush meqsitide, uyghur tarixchi doktor nebijan tursun namida mexsus oqush mukapati tesis qilghanliqini élan qildi.
tarixiy bir qedem: milli tarixchi namidiki tunji mukapat
2018-yilidin buyan türkiyediki hemkarlashquchi organlar bilen birlikte nurghunlighan uyghur oqughuchilarning aliy mektep xirajitini hel qilip kéliwatqan MMH fondi jem’iyiti, bu qétim xelq’araliq en’enilerge mas halda, öz saheside gewdilik töhpe qoshqan shexslerning namida mukapat bérishni qarar qilghan.
bu da’iride, uyghur we ottura asiya tarixi tetqiqatidiki zor xizmetliri, jümlidin 13 tomluq «uyghur omumiy tarixi» qamusining mu’ellipi, tarixshunas we zhurnalist doktor nebijan tursun ependining namida oqush mukapati tesis qilindi.
doktur nebijan tursun mezkur mukapatning tess qilinishi heqqide uyghur pochtisigha mundaq didi:
«men ötken yili awstraliyede 3 sheherde ilmiy seperde bolup, sydnéy uniwérsitétida professor deywid bropi ( David Brophy)ning riyasetchilikide sherqiy türkistan jumhuriyiti we uyghur milletperwerliki heqqide léksiye bergendin kéyin hemde bulardin bashqa sydnéy, adélayd, mélborné qatarliq sheherlerdiki uyghur éli jama’itige uyghur tarixi boyiche bir qanche meydan leksiye sözlesh jeryanida aswtraliyede pa’aliyet qiliwatqan mmh xeyri saxawet fondi méning namimda mexsus uyghur tarixi oquydighan oqughuchilargha yardem bérish, bu arqiliq uyghurlar tarixini tetqiq qilidighan we terghibat qilidighan yéngi ewladlarni terbiyeleshni nishan qilghan bir oqush mukapati bérishni oylishiwatqanliqini, we méning raziliqimni sorighanidi. men bu muhim ishqa raziliq bildürgenidim. mane emdi ular resmiy qarar bilen bu oqush mukatini resmiy tarqitish ishigha kiriship, bu xewerni manga yetüzdi. elwette, ulargha chin dilimdin rexmet éytimen. ular, bu yil tarix kespidiki bir magistir oqughuchigha mukapat tarqitish, kéler yilidin bashlap uni téximu köpeytish hemde türkiyedin bashqimu ellerdiki uyghur magistir yaki doktorlirining uyghur tarixi boyiche oqushigha yardem körsitishni arzu qiliwatqanliqini éytti, méningche bu nahayti yaxshi bir plan, uyghur xelqining tarixini öginish we tetqiq qilish, kelgüside bu sahening téximu küchlük mutexxesislirini yétishtürüsh muhim we shereplik xizmettur. emeliyette uyghurlarning özliridin uyghur tarixini tetqiq qilidighan xelq’ara sewiyede ish élip baridighan yüzligen tarixshunaslar yétiship chiqishi kérek, uyghurlarning millet süpitide mewjut bolushi üchün uning tarixi muhim meniwi asastur. öz tarixini bilmigen, tejribilirini yekünlimigen milletning kélechiki ghuwa bolushi shübhisiz.»
mukapatqa érishish shertliri
bu yil sinaq teriqiside bir neper oqughuchigha bérilidighan bu mukapatqa iltimas qilghuchilar töwendiki shertlerge uyghun bolushi kérek:
- kimliki: uyghur bolushi we türkiyede yashawatqan bolushi lazim.
- oqush arqa körünüshi: tarix penliri boyiche baklawérliq (Bachelor) oqushini tamamlighan bolushi, hemde uyghur tarixi tetqiqati boyiche magistirliqta oquwatqan yaki oqush aldida bolushi shert.
- nishani: kelgüside uyghur tarixini chongqur tetqiq qilish we terghip qilish iradisige ige bolushi kérek.
alahide purset
mukapatqa érishken oqughuchi iqtisadiy yardemdin sirt, yene doktor nebijan tursun ependi bilen biwaste alaqe qilish we uning ilmiy yétekchilikidin behrimen bolush pursitige ige bolidu.
iltimas qilish usuli
qiziqqan namzatlar özlirining tepsiliy terjimihali (CV) we toldurulghan jedwelni 2026-yili 5-ayning 5-küni istanbul waqti sa’et 17:00 giche töwendiki éléktronluq adrisqa yollisa bolidu:
