teyyarlighuchi: tahir imin uyghuri’an
ultra-konsérwatip sanaé takaychi: xitaygha qarshi, rok muzikisini yaxshi köridu
tokyo, 21-öktebir
yaponiye tarixidiki tunji ayal bash ministiri bolup saylan’ghan sanaé takaychi en’eniwi a’ile qimmet qarashlirigha ége, ultra-konsérwatip siyasetchi bolup, éghir métal (Heavy Metal) muzikilirigha — yeni rok muzikisining bir türige — alahide amraq.
uyghurlarning küchlük qollighuchisi
takaychi xanim xitaygha qarshi pozitsiye tutupla qalmay, yene uyghurlarning küchlük qollighuchisi bolup, u yaponiye uyghur jem’iyiti we dunya uyghur qurultiyi uyushturghan pa’aliyetlerge köp qétim qatnashqan hemde wekilliri bilen köp qétim körüshken.
u yaponiye uyghur jem’iyiti bu yil 5-ayda yaponiye dölet mejliside ötküzgen «uyghur mejburiy emgiki mesilisi» heqqidiki yighin’gha qatniship mundaq dégen:«bu bir insan hoquqi mesilisi. men shexsen yaponiyeningmu amérika qanunigha oxshash bir qanunni tüzüp chiqqini eng yaxshi dep qaraymen.»
parlamént hayati: u 1993-yili tunji qétim parlaméntqa saylan’ghan bolup, omumiy 10 qétim parlamént ezasi bolghan. u 1996-yili libéral démokratik partiyege (LDP) kirgen.
muhim wezipiler: u bash ministir abé we kishida hökümetliride ichki ishlar we alaqe ministiri, iqtisadiy bixeterlik dölet ministiri qatarliq bir qanche muhim kabinét wezipilirini ötigen.
LDP rehberlik maqami: u 2021-we 2024-yillardiki saylamda meghlup bolghandin kéyin, 2025-yili LDP ning tunji ayal re’isi bolup saylan’ghan, arqidin parlaméntning saylishi bilen bash ministir bolghan.
takaychi libéral démokratik partiye (LDP) ning rehbiri bolup saylan’ghandin bir nechche hepte ötkendin kéyin, seyshenbe küni yaponiye parlaménti uni resmiy bash ministirlikke saylidi. bu partiye axirqi 70 yilning köp qismida hakimiyet yürgüzgen konsérwatip partiye hésablinidu. nöwette LDP ning téximu ong qanatqa yötkiliwatqanliqi melum: bu ayning bashlirida libéral démokratik partiye uzun yilliq ittipaqdishidin ayrilghandin kéyin, u peqet ong qanat populistik partiye bilen ittipaq tüzüsh arqiliqla takaychini saylap chiqti.
«kanda» xelq’ara tetqiqat uniwérsitétining oqutquchisi jéffréy xol (Jeffrey Hall) ning chüshendürüshiche, 64 yashliq takaychi «yaponiyening konsérwatip LDP partiyisidiki eng konsérwatip kishilerning biri». u téximu qattiq köchmenlik cheklimilirini teshebbus qilip, xitaygha qarshi ochuq-ashkara siyasetlerni qollighan. kishiler uni margarét sachirgha (Margaret Thatcher) sélishturidighan bolup, u özimu uninggha hewes qilidighanliqini bildürgen we uninggha hörmet bildürüsh üchün köp hallarda kök renglik kastyum-burulka kiyip yüridu.
u aliy mekteptiki muzika etritide dumbaq chalghan bolup, «Deep Purple» we «Iron Maiden» ni eng yaxshi köridighan muzika etriti qatarida körsitidu. u bir qétim memliketlik téléwiziyede bir rok naxshisini éytqan bolup, u yene motosiklit we mashinigha bolghan küchlük qiziqishini saqlap kelmekte. xol mundaq dégen: «bular uning teshwiq qiliwatqan xaraktérining bir qismi. yeni u peqetla ‘küchlük tömür xanim’ emes, belki aram alalaydighan, hayattin huzurlinalaydighan bir shexs».
